Akramjon Abduhamidov Namangan viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimiga tayinlandi. Bu haqda viloyat hokimligi axborot xizmati xabar berdi.
Akramjon Abduhamidov 1973-yilda Namangan viloyati Yangiqo‘rg‘on tumanida tug‘ilgan. 1997-yilda Jahon iqtisodiyoti va diplomatiya universitetini, 2000-yilda Bank-moliya akademiyasini tamomlagan. Mutaxassisligi bo‘yicha iqtisodchi.
Mehnat faoliyatini 1997-yilda Moliya vazirligi mulkning davlat ulushi bo‘yicha dividendlar hisoblanishi va foydalanishi ustidan nazorat qilish boshqarmasi 1-toifali iqtisodchisi vazifasidan boshlagan. 1999—2002-yillarda Moliya vazirligi qimmatli qog‘ozlar va moliya bozori boshqarmasi bosh iqtisodchisi, bo‘lim boshlig‘i o‘rinbosari lavozimlarida ishlagan.
Akramjon Abduhamidov 2022-yildan tayinlovga qadar O‘zbekiston Prezidenti administratsiyasi Nazorat inspeksiyasi bosh konsultanti lavozimida ishlab kelayotgandi.
So‘nggi tayinlovlar
Oldinroq Ilhom Qilichxonov Toshkent viloyatining Nurafshon shahri hokimi etib tayinlangandi. Undan oldin Baxtiyor Rahmonov yana Toshkent hokimi o‘rinbosarligiga qaytgani to‘g‘risida xabar berilgan edi.
Aprel boshida Akmal Mahmudaliyev Sirdaryo viloyati hokimi lavozimiga tasdiqlangan, Shavkat Umrzoqov Toshkent shahri hokimi vazifasini bajaruvchi etib tayinlangan, Xorazm viloyatining ikki tumanida hokimlar almashgan edi.
Izoh (0)