Iqtisodiyot sohasi – barcha mamlakatlar rivoji uchun muhim bo‘lgan sohalardan biri. Ushbu sohani o‘rganish va uni amalda qo‘llay bilish har bir mamlakat taraqqiyotining bir bo‘lagi hisoblanadi. Ushbu yo‘nalish bo‘yicha xorijda o‘qiyotgan o‘zbekistonlik talabalar ham yetarlicha. Ulardan biri – Germaniyaning Trir universitetida tahsil olayotgan Hamidullo Nazrullayev.
Vatandoshimiz “Daryo” muxbiri bilan suhbatda Germaniyaga kelgani, yoshlarga maslahatlari va O‘zbekistonga qaytishi haqida gapirdi.
“Andijon viloyati Baliqchi tumanida katta bo‘lganman. Boshlang‘ich taʼlimni o‘sha yerda olganman. Otam yoshligimdan ingliz tili va matematika to‘garaklariga olib borganlar. Shundan keyin matematika va ingliz tiliga juda ham qiziqish ortgan. O‘shandan beri bu fanlarni o‘rganib kelaman. Keyinroq baholarimni yaxshilab, shu fanlardan jiddiy o‘qiganman. 2018-yili Andijon mashinasozlik instituti iqtisodiyot yo‘nalishiga qabul qilinib, u yerda bakalavr darajasini olganman.
Yevropadan Germaniya davlatini tanlashimga sabab – bu davlatning iqtisodiy ko‘rsatkichlarini inobatga olganman va turli xil sohalarda dunyoda birinchi o‘rinda turishi qiziq tuyulgan. Oilada ota-onam bilan doim maslahatlashaman. Ular chet elda o‘qish fikrimni qo‘llab-quvvatlashgan. Asosan, otam menga motivatsiya bag‘ishlagan. O‘qishga tayyorlanish chog‘ida ko‘p qiyinchiliklar va muvaffaqiyatsizliklar bo‘lgan. O‘sha vaqtlarda ota-onam menga ishonishlarini taʼkidlab kelishgan. Ularning duolari tufayli shu darajagacha yetib kelganman.
O‘qishga topshirish muddati 6-7 oyni talab qilgan, chunki 2021-yil oktyabr-noyabr oylarida o‘qishni boshlaganman. 6-7 universitetga hujjat topshirib, beshtasiga grant asosida o‘qishga qabul qilinganman. O‘qishga topshirayotgan vaqtda asosan IELTS bahosi 6,5-7 bo‘lishi, nemis tilida o‘qisak, B2 yoki C1 daraja talab etiladi. O‘qish davomida yoki bitirgach, faollik ham inobatga olinadi.
Germaniyaning Trir shahriga ilk marotaba 2021-yil 28-oktyabrda shahriga kelganman. Asosiy qiyinchiliklar o‘qish jarayonida bo‘ldi. Insonlar bilan tanishish va yangi do‘stlar ottirish maqsadida universitetdagi har xil tadbir va ekskursiyalarga qo‘shilganman. Xalqaro talabalar bilan tanishib, chetdan va Germaniyaning turli shaharlaridan bo‘lgan talabalar bilan tanishib, do‘stlashganman. Kelganimdagi ikkinchi kundan boshlab juda ko‘plar do‘stlar orttirganman.
Har doim Germaniyaga kelganimda o‘zbeklar bormikan deb qidirardim va aynan yurtdoshlarimiz ko‘magida qiyinchiliklarni yengib o‘tganman. Germaniyadagi o‘qish xarajatlarini qoplash uchun hafta so‘ngida turli ishlarni bajaraman. Qolgan vaqtda esa, asosan, o‘qish bilan band bo‘laman.
O‘zbekistondagi do‘stlarimizga eng kamida ikkita chet tilini o‘rganishni maslahat beraman. Yana bir tavsiyam, kompyuter sohasidagi bilimlarni o‘rganib boring. Bundan tashqari, kelajakda o‘zingizga qiziq bo‘lgan sohada o‘qing. Faqatgina pulni orqasidan quvib emas, o‘zingiz sevib qiladigan soha bo‘yicha taʼlim olib, ishni olib boring.
Iqtisodiyot bo‘yicha o‘qib, bilimlarimni oshirar ekanman, kelgusida albatta Vatanimizga qaytib, O‘zbekiston iqtisodiyoti yo‘lida hissa qo‘shishga harakat qilaman. Hali qilinadigan ishlar ko‘p, ularni xorij tajribasi asosida qilish lozim deb bilaman va olgan bilimlarimizni O‘zbekiston rivoji yo‘lida ishlatamiz”.
Izoh (0)