O‘zbekiston va Germaniya hamkorlikda “Robert Kox—Ibn Sino” tibbiyot fondi tashkil etadi. Bu haqda Sog‘liqni saqlash vazirligi axborot xizmati xabar berdi.
Xabarga ko‘ra, sog‘liqni saqlash vaziri Amrillo Inoyatov Germaniyaning mamlakatdagi favqulodda va muxtor elchisi Tilo Klinner bilan muloqot o‘tkazdi. Uchrashuvda tibbiyot sohasi bo‘yicha ko‘p qirrali aloqalarni kengaytirish, o‘zaro hamkorlikda yangi loyihalarni amalga oshirish masalalari muhokama qilindi.
Germaniyaning KfW banki bilan O‘zbekistonda sog‘liqni saqlash muassasalarini modernizatsiya qilish, zamonaviy asbob-uskunalar bilan jihozlash, muqobil energiya manbalarini ishga tushirish va tibbiy taʼlim bo‘yicha umumiy qiymati 175 million yevroga teng 7 ta investitsiyaviy hamda grant loyihasi amalga oshirilmoqda. Jumladan, “Reproduktiv salomatlik, onalik va bolalikni muhofaza qilish” loyihasi mamlakatda ixtisoslashgan pediatriya xizmatini yaxshilashga qaratilgan.
Qayd etilishicha, “Sil kasalligiga qarshi kurash” grant loyihasining 5 va 6-bosqichi Respublika ixtisoslashgan ftiziatriya va pulmonologiya ilmiy-amaliy tibbiyot markazi hamda hududiy silga qarshi dispanserlarni zamonaviy jihoz va asbob-uskunalar bilan taʼminlashni ko‘zda tutadi.
Shuningdek, Germaniyaning Sharite va Robert Kox universitetlari klinikalari bilan hamkorlikda “Robert Kox – Ibn Sino” tibbiyot fondi tashkil etilib, uning doirasida tibbiyot mutaxassislari malakasini oshirish, telemeditsina yordamida mahorat darslari qamrovini oshirish, xorijiy investitsiyani jalb qilish belgilangan.
Muloqot davomida shu yilning 26—27-may kunlari Samarqand shahrida O‘zbekiston—Germaniya xalqaro tibbiyot forumi o‘tkazilishi yuzasidan kelishuvga erishildi. Ushbu nufuzli tadbir orqali ikki davlat o‘rtasida sog‘liqni saqlash, tibbiy taʼlim, farmatsevtika, IT, xalq tabobati kabi qator yo‘nalishlarda hamkorlikni yanada kengaytirish, o‘zaro tajriba almashish va sohaga daxldor qo‘shma korxonalar yaratish imkoniyatlarini o‘rganish maqsad qilingan.
Izoh (0)