Toshkent shahridagi isitish tarmoqlari gidravlik sinovdan o‘tkaziladi. Bu haqda poytaxtdagi issiq suv va issiqlik taʼminoti operatori Veolia Energy Tashkent ma’lum qildi.
Qayd etilishicha, isitish mavsumiga tayyorgarlik ko‘rish maqsadida 1-maydan 4-avgustgacha bo‘lgan davrda isitish tarmoqlarini mexanik kuch va zichlik uchun yuqori bosim ostida issiqlik tarmoqlarining sinovlari tashkil etiladi.
Ushbu sinovlar isitish mavsumiga yuqori sifatli tayyorgarlik ko‘rish va issiq suv taʼminoti uchun isteʼmolchilarni cheklamasdan amalga oshiriladi.
Kompaniya sinovlar davomida issiqlik tarmoqlari quvurlarining shikastlanishi va issiq suv yo‘llar hamda yo‘laklarga chiqishi mumkinligidan ogohlantirgan.
“Haydovchilar, piyodalar hamda maʼmuriy va turarjoy binolarida yashovchi fuqarolardan eʼtiborli va ehtiyot bo‘lishlarini so‘raymiz”, — deyiladi xabarda.
Nosozliklar haqida quyidagi telefon orqali xabar berish so‘raladi: 78 129-01-85. Sinov jadvalga muvofiq o‘tkaziladi, ular bilan quyidagi havola orqali tanishish mumkin.
Toshkent shahrida 27-apreldan 30-mayga qadar bahor-yozgi mavsumga tayyorgarlik bo‘yicha katta hajmli suv o‘tkazgich tarmoqlarida rejali profilaktika-taʼmirlash ishlari olib borilishi munosabati bilan ichimlik suvi rejali o‘chirilishi ma’lum qilingandi.
Izoh (0)