Олмаотада аҳоли кана чақишидан шикоят қилмоқда

Қозоғистоннинг Олмаота шаҳри аҳолиси кана чақаётганидан шикоят қилмоқда. Бу ҳақда “Дарё”нинг республикадаги мухбири хабар берди.

Ҳозиргача 350 дан ортиқ фуқаро чақиш ҳақида хабар берган, улардан 187 нафари болалардир. Бир кишида энцефалит аниқланган. Шунга қарамай, кана чақиш ҳолатлари ўтган йилнинг шу даврига нисбатан 1,5 бараварга камайган, 2022 йил 563 та ҳолат қайд этилганди.

Профилактика мақсадида шаҳар ҳокимияти ҳар йили канага қарши тозалаш ишларини амалга оширади. Март ойида 2,5 минг гектарга яқин майдонлар, боғлар ва ўрмонлар дезинфекция қилинган. Дезинфекциянинг иккинчи босқичи май июнь ойларига мўлжалланган. Шу билан бирга, мутахассислар аҳолига ҳимояланиш учун кана энцефалит ига қарши эмланишни маслаҳат бермоқда.

“Шаҳарда эмлашни яшаш жойидаги шаҳар поликлиникаларида шифокор билан маслаҳатлашганидан кейин бепул олиш мумкин. Курс 7 ойлик интервал билан 2 та эмлашдан иборат. Эмлашлар йил давомида, шу жумладан, эпидемия мавсумида ҳам амалга оширилиши мумкин. Биринчи ва иккинчи эмлашлар орасидаги энг мақбул интервал 5-7 ой. Эпидемиологик мавсумда кана энцефалит ўчоғига ташриф буюриш иккинчи эмлашдан кейин 2 ҳафтадан кечиктирмай рухсат этилади”, — дейди давлат санитария бош врачи Қосим Алписбойўғли.

Кана чақишидан қочиш учун оддий хавфсизлик қоидаларини эслаб қолиб, уларга риоя қилиш керак. Табиатга чиққанда ёпиқ кийим кийиш керак, уст-бошни текшириш зарур.

Агар кана аллақачон терида бўлса, унда уни дарҳол олиб ташламаслик керак. Аввало шифокор билан боғланиш зарур. Агар бунинг иложи бўлмаса, кана чаққан жойга бир томчи исталган турдаги ёғни томизиш керак. Бу кана ниши терида қолмаслигига ёрдам беради. Мазкур процедурадан сўнг кана энцефалитига текшириш учун касалхонага бориш керак.