Respublika teri-tanosil klinik shifoxonasida vitiligo kasalligi hujayra ko‘chirish yo‘li bilan davolanmoqda. Bu haqda Sog‘liqni saqlash vazirligi axborot xizmati xabar berdi.
2022-yil markazga turli teri kasalliklari bilan 14 280 nafar bemor murojaat qilib, 1338 nafari stasionar sharoitda davolangan. Shu davrda xorijiy davlatlardan 257 nafar bemor murojaat qilgan bo‘lib, bu ko‘rsatkich 2021-yilda 198 nafarni tashkil qilgan.
2022-yilda soch to‘kilishi diagnostikasi uchun trixoskopiya, xol va o‘simtalarni tekshirishda dermatoskopiya va dermatomorfologiya usullari takomillashtirilgan. Shuningdek, pufakli kasalliklar diagnostikasida zamonaviy PIF ( to‘g‘ridan to‘g‘ri immunofluoressent tahlil) analizi o‘zlashtirilmoqda. Bundan tashqari, immunogistoximik laboratoriya tashkil qilishga kirishilgan.
Joriy yilda muassasada vitiligo, psoriaz, allergik va boshqa kasalliklarda yuqori natija beruvchi plazmoferez, fratsion va eksimer lazer, ozonoterapiya hamda yangi fizioterapiya usullari o‘zlashtirilgan. Dermatokosmetologiya bo‘limining tashkil qilinishi davolashning zamonaviy usullari hisoblangan fratsion SO2 lazer, eksimer lazer, plazmoferez, ozonator, zamonaviy koagulyator va boshqa zamonaviy texnologiyalardan foydalanish imkonini bermoqda.
Klinika mutaxassislari Turkiya, Koreya, Rossiya kabi mamlakatlarda malaka oshirib, davolashning yangi zamonaviy usullarini o‘zlashtirmoqda. Jumladan, Turkiyaning yetakchi tibbiyot muassasalaridan bo‘lgan Neo Life klinikasi hamda Rossiyaning Xalqlar do‘stligi universiteti klinikasi bilan imzolangan memorandum asosida klinika xodimlari ushbu muassasalarda o‘qib, malakasini oshirib qaytgan. O‘z navbatida, Rossiyaning Xalqlar do‘stligi universiteti talabalari Respublika teri-tanosil kasalliklari klinik shifoxonasida tropik xastaliklarni davolash yo‘nalishi bo‘yicha tahsil olmoqda.
Izoh (0)