Senatning Budjet va iqtisodiy islohotlar masalalari qo‘mitasining navbatdagi majlisida “O‘zbekiston Respublikasining ayrim qonun hujjatlariga tadbirkorlarning bank hisobvaraqlaridagi pul mablag‘lari daxlsizligini ta’minlashga qaratilgan qo‘shimcha va o‘zgartishlar kiritish to‘g‘risida”gi qonun ko‘rib chiqildi.
Majlisda O‘zbekistonda bugungi kunda tadbirkorlarni tashvishga solayotgan muammolarni hal etish orqali ularning huquq va manfaatlarini himoya qilishga qaratilgan qator qonun hujjatlari qabul qilinayotgan bo‘lib, mazkur qonun ham bu boradagi ishlarning mantiqiy davomi hisoblanishi qayd etildi.
Xususan, qonun bilan tadbirkorlik subyektlarining bank hisob varaqlaridan pul mablag‘larini ularning roziligisiz qonunga xilof ravishda o‘tkazganlik yoki olib qo‘yganlik yoxud ortiqcha undirilgan mablag‘larni o‘z vaqtida qaytarmaganlik uchun Ma’muriy javobgarlik to‘g‘risidagi kodeksida va Jinoyat kodeksida ma’muriy va jinoiy javobgarlik choralari belgilanmoqda.
Qonun bilan Ma’muriy javobgarlik to‘g‘risidagi kodeksga qo‘shimcha modda kiritilib, bank hisob varaqlaridagi pul mablag‘larini tadbirkorlik subyektlarining roziligisiz qonunga xilof ravishda o‘tkazish yoki olib qo‘yish yoxud ortiqcha undirilgan pulni o‘z vaqtida qaytarmaslik holati bo‘yicha aybdorga bazaviy hisoblash miqdorining 20 barobaridan 40 barobarigacha (6,6 mln so‘mdan 13,2 mln so‘mgacha) miqdorda jarima solinishi qayd etilmoqda.
Shuningdek, qonun bilan tadbirkorlarning pul mablag‘larini qonunga xilof ravishda o‘tkazish yoki olib qo‘yish yoxud ularni o‘z vaqtida qaytarmaslik yuzasidan Jinoyat kodeksiga qo‘shimcha modda kiritilmoqda, unga ko‘ra mazkur holatlar ma’muriy jazo qo‘llanilgandan keyin ham sodir etiladigan bo‘lsa, bazaviy hisoblash miqdorining 200 barobaridan 300 baravarigacha miqdorda jarima, sodir etilgan jinoyatning toifasiga qarab 7 yilgacha ozodlikdan mahrum qilish jazosi belgilanmoqda.
Qonun qo‘mita majlisida dastlabki tarzda ko‘rib chiqildi va uning qabul qilinishi tadbirkorlik subyektlarining qonuniy manfaatlarini himoya qilishning huquqiy choralarini kuchaytirishga va ularning mulkiy huquqlari daxlsizligini himoya qilish samaradorligini oshirishga xizmat qilishi qayd etildi.
Izoh (0)