“O‘zbekneftgaz”ga qarashli avtomobillarga yoqilg‘i quyish shoxobchalarida Ai-92 markali benzin narxi yana pasayishi kutilmoqda. Bu haqda Energetika vazirligi matbuot xizmati xabar berdi.
![](/static/nigora/benzin.jpg)
Mart oyining o‘rtalarida UNG Petro benzin quyish shoxobchalarida ushbu markadagi benzin uchun bahorgi chegirma e’lon qilingan bo‘lib, 7 500 so‘mdan sotilmoqda. 30-aprel kuni UNG Petro shoxobchalarida Ai-92 benzini uchun chegirma 1-maydan to‘xtatilishi haqida xabar chiqarildi.
Energetika vazirligi matbuot xizmatining bildirishicha, ushbu sanadan boshlab “O‘zbekneftgaz”ga qarashli avtomobillarga yoqilg‘i quyish shoxobchalarida AI-92 benzini narxi oshirilmaydi. UNG Petro mas’ul xodimlari bu boradagi xabarni shoshma-shosharlik bilan, rahbariyat bilan kelishmasdan ijtimoiy tarmoqda e’lon qilgan va bu holat bo‘yicha ularga nisbatan tegishli choralar ko‘riladi.
“Shuni alohida ta’kidlash kerakki, ko‘rilayotgan choralar natijasida Ai-92 markali avtobenzin narxi may oyi ichida 7 500 so‘mdan ham arzonlashishi kutilmoqda”, — deya qo‘shimcha qilgan vazirlik o‘z axborotida.