Bugun, 2023-yilning 30-aprel kuni soat 08:00 dan boshlab O‘zbekistonning barcha hududlarida Konstitutsiyaviy o‘zgarishlarga befarq bo‘lmaganlar uchun referendumda ovoz berish jarayonlari boshlab yuborildi. Jumladan Prezident administratsiyasi rahbari Sardor Umurzoqov boshchiligidagi administratsiya mas’ullari — Prezident administratsiyasi rahbarining o‘rinbosari Komil Allamjonov, prezident matbuot kotibi Sherzod Asadov, sho‘ba mudiri Saida Mirziyoyeva referendumda ovoz berdi.
Bugun, shuningdek, Qoraqalpog‘iston Jo‘qorg‘i Kengesi raisi hamda viloyat hokimlari ham o‘zlari ro‘yxatda turgan hududlardagi referendum uchastkalarida bo‘lib, fuqarolik huquqidan foydalandi.
Qoraqalpog‘iston Jo‘qorg‘i Kengesi raisi Amanbay O‘rinbayev Nukus shahridagi 7-referendumda ovoz berdi.
Toshkent viloyati hokimi Zoir Mirzayev Nurafshon shahrining “Dehqonobod” mahallasida joylashgan 7-referendum uchastkasiga turmush o‘rtog‘i bilan birga borib, fuqarolik huquqidan foydalangan holda ovoz berish jarayonida ishtirok etdi.
Viloyat hokimi ovoz berish jarayonlaridan so‘ng OAV vakillarini qiziqtirgan savollarga javob berar ekan, referendum uzoq kutilgan jarayon ekanini, O‘zbekistonda birinchi marotaba yangilangan Konstitutsiya referendumida ishtirok etayotganidan xursandligini taʼkidlab, yangilanayotgan Konstitutsiya muallif o‘zbekistonliklar ekanini bildirdi.
Ovoz berish jarayonlarida yakka holda ko‘rinish bergan Samarqand viloyati hokimi Erkinjon Turdimov Samarqand shahridagi 42-umumiy o‘rta taʼlim maktabida joylashgan 144-referendum uchastkasida, Buxoro viloyati hokimi Botir Zaripov esa Buxoro shahridagi 49-referendum uchastkasida ovoz berib, fuqarolik huquqidan foydalandi.
Sirdaryo viloyati hokimi Akmaljon Mahmudaliyev Guliston shahridagi 15-referendum uchastkasida Konstitutsiyaviy o‘zgartishga munosabat bildirgan bo‘lsa, Farg‘ona viloyati hokimi Xayrullo Bozorov Farg‘ona shahridagi 88-referendum uchastkasida o‘z huquqidan foydalandi.
Qashqadaryo viloyati hokimi Murodjon Azimov Qarshi shahridagi 4-referendum uchastkasida, Jizzax viloyati hokimi Ergash Soliyev Jizzax shahrining “Toshloq” mahallasidagi 39-referendum uchastkasida, Surxondaryo viloyati hokimi Ulug‘bek Qosimov Termiz shahridagi 260-referendum uchastkasida, Andijon viloyati hokimi Shuhrat Abdurahmonov esa Andijon shahridagi 30-umumtaʼlim maktabida joylashgan 51-referendum uchastkasida, Xorazm viloyati hokimi Jo‘rabek Rahimov esa Urganch shahridagi 28-referendum uchastkasida bo‘lib, fuqarolik huquqidan foydalangan holda ovoz berish jarayonida faol ishtirok etdi.
Toshkent shahar hokimligi axborot xizmati rahbari Mukarram Azimovaning “Daryo”ga bildirishicha, shahar hokimi Shavkat Umurzoqov 434-referendum uchastkasida bo‘lib, fuqarolik huquqidan foydalangan.
.jpg)
Tarmoqlarda hozircha, Navoiy viloyati hokimlarining referendumda qatnashgani aks etgan suratlar tarqalmadi.
Izoh (0)