Andijon viloyatida tashkil etilgan 928 ta saylov uchastkalarida yangi tahrirdagi Konstitutsiya bo‘yicha referendumda o‘z munosabatini bildirishda andijonliklar faol ishtirok etmoqda. Bu haqda “Daryo” muxbiri Umidjon Mamarasulov xabar bermoqda.
Marhamat tumanida istiqomat qiluvchi 98 yoshli Iminjon ota Temirov yosh umrining sakkiz yilini urushda o‘tkazgan. U 113-maxsus o‘qchi brigada tarkibida bo‘linma komandiri vazifasida 1941—1942-yillarda Kuban hududidagi janglarda ishtirok etib, so‘ng Uzoq Sharqda Yaponiyaga qarshi urushda Janubiy Saxalin va Kuril orollaridagi harbiy harakatlarda qatnashgan.
Bugungi referendumda Iminjon ota o‘zi yashayotgan hududdagi 563-referendum uchastkasiga borib, ovoz berdi.
“Mahalladagilar tushlikdan keyin uyga ko‘chma quti olib kelishadi deyishdi. Lekin ularning kelishini istamadim. Shuning uchun shartta hassamni qo‘lga olib, bu yoqqa qarab kelaverdim. Evaralarimning kelajagi uchun ovoz berdim”, — deydi Iminjon ota Temirov.
Iminjon ota kabi tumandagi “Gar-Gar” mahallasida yashayotgan 94 yoshli Abdurahmon ota Hojialiyev hamda Gulsoraxon aya Hayitboyevalar ham referendum uchastkalariga shaxsan o‘zi borib, ovoz berishgan.
Maʼlumot uchun, bo‘lib o‘tayotgan referendumda jami 1 million 702 ming 902 nafar andijonlik ishtirok etishi ko‘zda tutilgan. Shundan 39 ming 266 nafari ovoz berish jarayonlarida ilk bor ishtirok etayotgan yoshlar. Viloyatdagi 32 ta referendum uchastkasida ovoz berish jarayonlarini onlayn tarzda to‘g‘ridan-to‘g‘ri kuzatib borish imkoni yaratilgan.
Izoh (0)