Ijtimoiy tarmoqlarda oliy ta’lim muassasalari xodimlari talabalarni ularning erkiga zid ravishda referendumda qatnashishga chorlayotgani haqida xabarlar tarqaldi. Holat bo‘yicha Oliy ta’lim, fan va innovatsiyalar vazirligi matbuot xizmati munosabat bildirdi.
Vazirlik o‘z qonunchilikka muvofiq O‘zbekiston fuqarolarining referendumda ishtirok etishi ixtiyoriy va erkindir. Fuqarolarni referendumda ishtirok etishga yoki ishtirok etmaslikka majbur qilish maqsadida ularga, shuningdek xohish-irodasini erkin bildirishiga ta‘sir ko‘rsatishga hech kim haqli emasligini eslatib o‘tdi.
“Barcha oliy ta‘lim muassasalari rahbariyati va mas‘ul xodimlari qonunchiligimizdagi ushbu talablardan xabardor etilgan va tizimda mazkur talablarga rioya etilishi vazirlikning alohida nazoratidadir. Vazirlik talabalarning referendumda ishtirok etishi ixtiyoriy va erkin bo‘lishini ta’minlash borasida qat‘iy pozitsiyaga ega”, — deyiladi munosabatda.
Vazirlik talabalar bu boradagi huquqlari biron-bir tarzda buzilayotgan bo‘lsa, +998712071762 raqamiga yoki tegishli huquqni muhofaza qilish organlariga xabar berishlarini so‘radi va aybdorlarga tegishli choralar ko‘rilishi ta’minlanishini qo‘shimcha qildi.
O‘zbekistonda 30-aprel kuni soat 8:00 dan 10 ming 758 uchastkada Konstitutsiyaning yangi tahriri bo‘yicha referendum boshlandi. Saylovchilar yagona elektron ro‘yxatiga 19 million 722 ming 809 nafar ovoz beruvchi fuqaro kiritilgan.
Markaziy saylov komissiyasi raisi Zayniddin Nizomxo‘jayev O‘zbekiston fuqarolarini referendumda ishtirok etishga yoki ishtirok etmaslikka majbur qilish maqsadida ularga, shuningdek xohish-irodasini erkin bildirishiga ta’sir ko‘rsatishga hech kim haqli emasligini, fuqarolarning o‘z xohish-irodasini bildirishi nazorat qilinishiga yo‘l qo‘yilmasligini ta‘kidlab o‘tgandi.
Izoh (0)