Xabaringiz bor, bugun, 30-aprel kuni O‘zbekistonda katta tayyorgalik ko‘rilgan va umumiy budjeti 182 milliard so‘m bo‘lgan referendum bo‘lib o‘tdi. 2023-yilning 30-aprel kuni soat 17:00 ga qadar bo‘lgan hisob-kitoblarga ko‘ra ovoz berish huquqiga ega 19 milliondan ortiq o‘zbekistonliklarning 15 million 802 ming nafari, yaʼni 81,39 foizi yangilanayotgan Konstitutsiyaga nisbatan o‘z xohish-irodasini namoyon qildi.
Jarayonda ishtirok qilgan prezident Shavkat Mirziyoyev ham faol fuqarolik pozitsiyasini namoyon qilib, Toshkent shahrining Mirzo Ulug‘bek tumanidagi 59-referendum uchastkasiga oilaviy tashrif buyurdi va O‘zbekiston fuqarosi sifatida ovoz berdi.
Tonggi soat 08:00 da boshlangan jarayonda davlat amaldorlari, xususan Prezident Adminstratsiyasi rahbari Sardor Umrzoqov, Adminstratsiya rahbari o‘rinbosari Komil Allamjonov, prezident matbuot kotibi Sherzod Asadov hamda sho‘ba mudiri Saida Mirziyoyevalar ham boshqalarga nisbatan faol fuqaro ekanini namoyon qilib, ovoz berishni boshlab yubordi.
Referendum uchastkalarida ko‘rinish bergan viloyat hokimlarning eng chaqqoni bu — Samarqand viloyati hokimi Erkinjon Turdimov bo‘ldi. Ko‘p o‘tmay Buxoro viloyati hokimi Botir Zaripov Buxoro shahridagi 49-referendum uchastkasida faol fuqaro sifatida namoyon bo‘lib, huquqidan foydalandi. Sirdaryo viloyati hokimi Akmaljon Mahmudaliyev esa Guliston shahridagi 15-referendum uchastkasiga borib, referendumda ovoz berishda viloyat ahliga namuna bo‘ldi.
Toshkent viloyati hokimi Zoir Mirzayev viloyatning Nurafshon shahridagi 7-referendum uchastkasiga oilaviy tashrif buyurib, nafaqat ovoz berdi, Ommaviy axborot vositalari vakillariga peshvoz chiqib, ularni qiziqtirgan savollarga javob ham qaytardi.
“Referendum uzoq kutilgan jarayon, O‘zbekistonda birinchi marotaba yangilangan Konstitutsiya referendumida ishtirok etayotganimizdan baxtiyormiz”, — dedi Zoir Mirzayev.
Bugungi referendumda shuningdek, endi oila qurayotgan kelin-kuyovlar, farzandini dunyoga keltirgan yosh onalar, 128 yoshini yashayotgan onaxonlar ham ishtirok etib, jamiyatdagi o‘zgarishlarga befarq emasligini ko‘rsatdi.
Jumladan Surxondaryo viloyatining Sherobod tumani “Bog‘iobod” mahallasida joylashgan 107-referendum uchastkasida nikoh to‘yi bo‘lib o‘tayotgan yosh kelin-kuyovlar — Farruh Qulmatov hamda Hayitgul Muhammadiyevalar ko‘rinish berib, o‘z fuqarolik huquqlaridan foydalangan.
.jpg)
Qolaversa Qashqadaryo viloyatining Kitob tumanida tug‘ruqxonada farzandini dunyoga keltirgan Maftuna Jo‘raqulova hamda Madina Jo‘rayevalar tug‘uruq bo‘limida yotgan bo‘lishiga qaramasdan yaratib berilgan imkoniyatdan foydalanib, referendumda ovoz berdi va fuqarolik huquqidan foydalandi.
Farg‘ona viloyatining Buvayda tumanida O‘zbekistondagi eng yoshi ulug‘ inson 128 yoshli Huvaydo momo Umarova ham referendumda ovoz berib, natijalarga o‘z hissasini qo‘shdi.
Izoh (0)