Sirdaryo va Jizzax viloyatining ayrim hududlarida elektr va ichimlik suvi ta’minotida uzilish kuzatilishi mumkin. Bu haqda Energetika vazirligi xabar berdi.
Ma’lum qilinishicha, soat 17:15 da Sirdaryo issiqlik elektr stansiyasidagi yuqori kuchlanishli elektr qurilmada nosozlik yuzaga kelgan. Buning natijasida Sardoba, Oqoltin, Mirzaobod, Yangiyer va Xovos tumanlarining ayrim hududlarida elektr ta’minotida uzilishlar kuzatilmoqda.
“O‘zsuvta’minot” yuqorida sanab o‘tilgan hududlardan tashqari Jizzax viloyatining ayrim hududlarida ham elektr ta’minoti bilan birgalikda ichimlik suv ta’minotida uzilish kuzatilishi mumkinligini xabar qildi.
Mavjud yetishmayotgan quvvatni Toshkent va Navoiy issiqlik elektr stansiyalari va “Chorvoq” gidroelektr stansiyasining zaxira quvvatlari hisobidan ta’minlash choralari ko‘rilmoqda.
Hozirda Sirdaryo issiqlik elektr stansiyasining maxsus brigadalari tomonidan mazkur nosozlikni bartaraf etish ishlari olib borilmoqda. Nosozlik qisqa vaqt ichida bartaraf etilishi va hududlarning elektr va suv ta’minoti qayta tiklanishi ta’kidlangan.
“Keltirilgan noqulayliklar uchun iste’molchilardan uzr so‘raymiz”, — deyiladi xabarda.
Energetika vazirligi Sirdaryo viloyati iste’molchilarining elektr ta’minoti to‘liq qayta tiklanganini ma’lum qildi. Hozirda issiqlik elektr stansiyasi barqaror ishlamoqda.
Izoh (0)