Shavkat Mirziyoyev referendumda ovoz berdi (foto) 

Shavkat Mirziyoyev 30-aprel kuni oila a’zolari bilan birga Toshkent shahri Mirzo Ulug‘bek tumanidagi 59-referendum uchastkasiga tashrif buyurib, referendumda ovoz berdi, deb xabar bermoqda Prezident matbuot xizmati. 

An’anaga ko‘ra, davlat rahbariga oila a’zolari hamrohlik qildi.

Referendumni 45 ta davlat va 14 nufuzli xalqaro tashkilotdan jami 383 nafar xalqaro kuzatuvchi bevosita kuzatib bormoqda. Mahalliy va xorijiy ommaviy axborot vositalari keng, ochiq-oshkora yoritmoqda.

Yangilanayotgan Konstitutsiya

Referendumda “O‘zbekiston Respublikasi Konstitutsiyasi to‘g‘risida”gi konstitutsiyaviy qonun loyihasi ovozga qo‘yilgan. Ma’lumki, bu jarayonga bir yarim yil mobaynida puxta tayyorgarlik ko‘rildi. Konstitutsiyaviy qonun loyihasi ommaviy axborot vositalarida e’lon qilinib, xalqning fikri o‘rganildi. Jamoatchilik tomonidan 220 mingdan ziyod takliflar kelib tushdi. Ularning har to‘rttasidan bittasi loyihadan joy oldi.

Ushbu takliflar asosida yangilanayotgan Konstitutsiyaga 27 ta yangi modda kiritildi. Ya’ni, moddalari soni amaldagi 128 tadan 155 taga, normalari 275 tadan 434 taga oshdi. Asosiy qonunning 65 foiz matni xalq takliflari asosida yangilandi. Bunda xalqaro tajriba ham inobatga olindi, turli sohalardan yetuk mutaxassislar va ekspertlar jalb etildi.

Konstitutsiya to‘g‘ridan-to‘g‘ri ishlaydigan hujjat bo‘lmoqda. Yaʼni, endi barcha fuqarolar hattoki o‘zining kundalik hayotida ham Konstitutsiyaga murojaat qiladi. Undagi barcha normalar, ularni qanday amaliyotda qo‘llashni ochib beruvchi qonunchilik hujjati mavjud yoki mavjud emasligidan qatʼi nazar, to‘g‘ridan-to‘g‘ri ishlaydi.