Qo‘qonda masjidda o‘g‘rilik qilgan erkakka jinoyat ishi qo‘zg‘atildi

Farg‘ona viloyati Qo‘qon shahrida masjidda o‘g‘rilik qilgan erkakka jinoyat ishi qo‘zg‘atildi. Bu haqda viloyat IIB axborot xizmati xabar berdi.

Xabarga ko‘ra, fuqaro X.S. IIBga murojaat qilgan. U o‘z murojaatida 10-fevral kuni nomaʼlum shaxs Yangi Chorsu ko‘chasida joylashgan jome masjidining tahoratxonasida qarovsiz qoldirgan kurtkasi cho‘ntagida bo‘lgan narxi 1 million 300 ming so‘mlik telefonni o‘g‘irlab, hodisa joyidan yashiringanini maʼlum qilgan.

Mazkur holat yuzasidan Qo‘qon shahar IIB huzuridagi tergov bo‘limi tomonidan jinoyat kodeksining 169-moddasi 1-qismi (o‘g‘rilik) bilan jinoyat ishi qo‘zg‘atilgan.

Olib borilgan tezkor-surishtiruv ishlari davomida, ushbu jinoyatni A.S. sodir etgani aniqlanib, tergov harakatlari olib borilmoqda.