“Nemis kompaniyalari O‘zbekistonga sarmoya kiritishga katta qiziqish bildirmoqda” — Germaniya – O‘zbekiston ishbilarmonlar kengashi ijrochi direktori Falk Porshe

Shavkat Mirziyoyev 2-3-may kunlari Germaniyaga tashrif buyuradi. Tashrif dasturiga muvofiq, Germaniyaning yetakchi kompaniyalari bilan innovatsion-texnologik sheriklikni kengaytirishga qaratilgan istiqbolli loyiha va dasturlarni amalga oshirishga alohida eʼtibor qaratiladi. 

Germaniya - O‘zbekiston ishbilarmonlar kengashi ijrochi direktori Falk Porshe ikki davlat o‘rtasidagi tadbirkorlik sohasidagi hamkorlik yuzasidan fikrlarini bildirib o‘tdi. 

Falk Porshening aytishicha, O‘zbekiston iqtisodiyoti jadal rivojlanmoqda. 

“Raqobatbardosh ustunliklarimiz birlashtirish biznesni rivojlantirish uchun katta imkoniyatlar yaratadi. Shu bois o‘tgan yili Markaziy Osiyoda birinchi va yagona bo‘lgan tolali shisha ishlab chiqaruvchi zavodni ishga tushirdik. Navbatdagi istiqbolli qo‘shma dasturlar bizni kutmoqda. O‘zbekiston iqtisodiyoti barqaror rivojlanmoqda, Xorijiy sarmoyadorlarning qiziqishi yuqori”, — deydi u.

Mutaxassis so‘nggi yillarda O‘zbekiston prezidenti tashabbusi bilan keng ko‘lamli islohotlari amalga oshirilganini alohida taʼkidlab, ishbilarmonlik muhiti yaxshilanganini aytdi. 

“O‘zbekiston rahbarining Germaniyaga ikkinchi marta amalga oshirayotgan bo‘lajak tashrifi mamlakatlarimiz o‘rtasidagi iqtisodiy aloqalarni yanada kengaytiradi. Shuningdek, siyosiy muloqotni chuqurlashtirish, sarmoyaviy va moliyaviy hamkorlikni kengaytirish, madaniy, gumanitar, ilmiy-maʼrifiy aloqalarni, sayyohlik almashinuvini faollashtirish masalalari yuqori darajada muhokama qilinishi ham muhim ahamiyatga ega. 

Germaniya – O‘zbekiston ishbilarmonlar kengashi ijrochi direktori sifatida yana bir bor taʼkidlamoqchimanki, nemis kompaniyalari O‘zbekistonga sarmoya kiritishga katta qiziqish bildirmoqda. Bizning tuzilmamiz esa mamlakatlar o‘rtasida muhim bog‘lovchi ko‘prik vazifasini o‘taydi”, — deydi Falk Porshe.