Giyohvandlik vositalari savdosiga qarshi kurashish borasida Davlat xavfsizlik xizmati xodimlari tomonidan Bojxona qo‘mitasi va Ichki ishlar organlari bilan hamkorlikda bir nechta tezkor tadbir o‘tkazildi.
Xususan, 1969-yilda Buxoro viloyatida tug‘ilgan, muqaddam giyohvandlik vositalari bilan bog‘liq jinoyati uchun sudlangan shaxs Surxondaryo viloyatining Denov shahrida istiqomat qiluvchi 22 yoshli tanishi oziq-ovqat mahsulotlari solingan karton quti ichiga yashirgan holda, Denov—Toshkent yo‘nalishida qatnovchi mashina orqali berib yuborgan 300 gramm opiy moddasini Chilonzor tumanida qabul qilib olgan vaqtida ushlangan.
Shuningdek, tezkor tadbir davom ettirilib, Denov shahrida yashovchi fuqaro ham ushlanib, uning uyidan 500 gramm opiy moddasi protsessual tartibda rasmiylashtirib olingan.
Toshkent viloyatining Bekobod shahrida joylashgan “Farhod” chegara-bojxona postida o‘tkazilgan tezkor tadbirda esa Tojikistonning Dushanbe shahrida yashovchi, 41 yoshli ayol 1,21 kilogramm va uning 19 yoshli qizi 744 gramm gashish moddasini o‘z egnidagi kiyimlari ostiga yashirib, bojxona nazoratidan o‘tkazishga uringanida qo‘lga olingan.
Toshkent shahrining Olmazor tumanida qayd etilgan holatda 30 yoshli muqaddam giyohvandlik vositalari bilan bog‘liq jinoyati uchun sudlangan shaxsning yonida 5 gramm, yashash xonadonida esa 649 gramm gashish moddasi borligi aniqlanib, ashyoviy dalil sifatida rasmiylashtirib olingan.
Yana bir holatda Toshkent shahrida yashovchi, 1986, 1987 va 1990-yillarda tug‘ilgan 3 nafar fuqaro ketayotgan Lacetti rusumli avtotransport vositasi Bektemir tumani hududida to‘xtatilib, ko‘zdan kechirilgan. Natijada, avtomashina saloni va yukxonasida 698 dona “Tropikamid” va 115 dona “Regapen” kuchli taʼsir qiluvchi dori vositalari hamda 7 gramm “Mefedron” sintetik narkotik moddasi borligi aniqlanib, protsessual tartibda rasmiylashtirib olingan.
Shuningdek, tezkor tadbir davom ettirilib, avtomashina egasining yashash xonadonidan 497 dona “Regapen” dori vositasi ashyoviy dalil sifatida olingan.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)