Respublika shoshilinch tibbiy yordam ilmiy markazi xodimlariga 2022-yil davomida 26 ta holatda tajovuz bo‘lgan. Bu haqda Toshkent shahar sudlari ma’lum qildi.
Jinoyat ishlari bo‘yicha Chilonzor tuman sudi raisi, uning o‘rinbosari va sudyalar tibbiyot xodimining qonuniy tibbiy faoliyatiga to‘sqinlik qilganlik uchun javobgarlik belgilanishi munosabati bilan Maʼmuriy javobgarlik to‘g‘risidagi kodeksga qo‘shimcha kiritilgani xususida tibbiyot xodimlarga tushuntirish berish maqsadida Respublika shoshilinch tibbiy yordam ilmiy markazida bo‘ldi.
Qonun bilan Maʼmuriy javobgarlik to‘g‘risidagi kodeks yangi 197-7-modda bilan to‘ldirilib, unda tibbiyot xodimining qonuniy tibbiy faoliyatiga to‘sqinlik qilish yoki shu maqsadda tibbiyot xodimiga turli shaklda qonunga xilof ravishda taʼsir o‘tkazish uchun maʼmuriy javobgarlik belgilandi.
Mazkur qilmish uchun fuqarolarga – 1,5 million so‘mdan 2,1 million so‘mgacha (bazaviy hisoblash miqdorining 5 baravaridan 7 baravarigacha), mansabdor shaxslarga esa 2,1 million so‘mdan 3 million so‘mgacha (7 baravardan 10 baravargacha) jarima yoki 15 sutkagacha maʼmuriy qamoq tarzidagi jazo belgilandi.
Tibbiyot xodimlariga tajovuzlar
Toshkent shahar Bektemir tumanida tez yordam mashinasida olib ketilayotgan ayol tibbiyot xodimlariga qarshilik ko‘rsatib, salondagi jihozlarni tepib sindirgani to‘g‘risida xabar berilgandi. Keyinroq ayol spirtli ichimlik ta’sirida bo‘lgani ma’lum qilingan edi.
Aprel boshlarida esa Toshkentning Yunusobod tez tibbiy yordam podstansiyasi feldsheri Zlata Gafurova chaqiriq bo‘yicha erkak shifokorlar brigadasini yuborgani uchun bemorning o‘g‘li tomonidan tahdidga uchrayotganini ma’lum qilgandi. Toshkent shahar sudlariga ko‘ra, maʼmuriy ish bo‘yicha sudga oid adabiyotshunoslik ekspertizasi tayinlangan. Ekspertiza xulosasi sudga taqdim etilgandan so‘ng ushbu maʼmuriy ishni ko‘rib chiqish davom ettiriladi.
Izoh (0)