Республика шошилинч тиббий ёрдам илмий маркази ходимларига 2022 йил давомида 26 та ҳолатда тажовуз бўлган. Бу ҳақда Тошкент шаҳар судлари маълум қилди.
Жиноят ишлари бўйича Чилонзор туман суди раиси, унинг ўринбосари ва судьялар тиббиёт ходимининг қонуний тиббий фаолиятига тўсқинлик қилганлик учун жавобгарлик белгиланиши муносабати билан Маъмурий жавобгарлик тўғрисидаги кодексга қўшимча киритилгани хусусида тиббиёт ходимларга тушунтириш бериш мақсадида Республика шошилинч тиббий ёрдам илмий марказида бўлди.
Қонун билан Маъмурий жавобгарлик тўғрисидаги кодекс янги 197-7-модда билан тўлдирилиб, унда тиббиёт ходимининг қонуний тиббий фаолиятига тўсқинлик қилиш ёки шу мақсадда тиббиёт ходимига турли шаклда қонунга хилоф равишда таъсир ўтказиш учун маъмурий жавобгарлик белгиланди.
Мазкур қилмиш учун фуқароларга – 1,5 миллион сўмдан 2,1 миллион сўмгача (базавий ҳисоблаш миқдорининг 5 бараваридан 7 бараваригача), мансабдор шахсларга эса 2,1 миллион сўмдан 3 миллион сўмгача (7 баравардан 10 бараваргача) жарима ёки 15 суткагача маъмурий қамоқ тарзидаги жазо белгиланди.
Тиббиёт ходимларига тажовузлар
Тошкент шаҳар Бектемир туманида тез ёрдам машинасида олиб кетилаётган аёл тиббиёт ходимларига қаршилик кўрсатиб, салондаги жиҳозларни тепиб синдиргани тўғрисида хабар берилганди. Кейинроқ аёл спиртли ичимлик таъсирида бўлгани маълум қилинган эди.
Апрель бошларида эса Тошкентнинг Юнусобод тез тиббий ёрдам подстанцияси фелдшери Злата Гафурова чақириқ бўйича эркак шифокорлар бригадасини юборгани учун беморнинг ўғли томонидан таҳдидга учраётганини маълум қилганди. Тошкент шаҳар судларига кўра, маъмурий иш бўйича судга оид адабиёцҳунослик экспертизаси тайинланган. Экспертиза хулосаси судга тақдим этилгандан сўнг ушбу маъмурий ишни кўриб чиқиш давом эттирилади.
Изоҳ (0)