Shavkat Mirziyoyev “Tibbiyot xodimining qonuniy tibbiy faoliyatiga to‘sqinlik qilganlik uchun javobgarlik belgilanishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga qo‘shimchalar kiritish haqida”gi qonunni imzoladi. Hujjat matni “Daryo” tahririyatida mavjud.
Qonun bilan Maʼmuriy javobgarlik to‘g‘risidagi kodeks yangi 197-7-modda bilan to‘ldirilib, unda tibbiyot xodimining qonuniy tibbiy faoliyatiga to‘sqinlik qilish yoki shu maqsadda tibbiyot xodimiga turli shaklda qonunga xilof ravishda taʼsir o‘tkazish uchun maʼmuriy javobgarlik belgilandi.
Mazkur qilmish uchun fuqarolarga – 1,5 million so‘mdan 2,1 million so‘mgacha (bazaviy hisoblash miqdorining 5 baravaridan 7 baravarigacha), mansabdor shaxslarga esa 2,1 million so‘mdan 3 million so‘mgacha (7 baravardan 10 baravargacha) jarima yoki 15 sutkagacha maʼmuriy qamoq tarzidagi jazo belgilandi.
Sog‘liqni saqlash vazirligi, Ichki ishlar vazirligi, Bosh prokuratura va boshqa manfaatdor tashkilotlarga ushbu qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini taʼminlash yuklatilgan.
Avvalroq Shavkat Mirziyoyev 27-mart kuni pedagog xodimlarning xizmat vazifalarini bajarishiga to‘sqinlik qilganlik uchun javobgarlikni kuchaytirishni ko‘zda tutuvchi qonunni imzolagani to‘g‘risida xabar berilgandi.
Izoh (0)