Xorazmdagi bozorda homilador ayol o‘g‘irlik qildi

Xorazm viloyati Hazorasp tumanidagi bozorda 23-mart kuni homilador ayol o‘g‘irlik qildi. Bu haqda Tergov departamenti axborot xizmati xabar berdi.

Qayd etilishicha, shu kuni noma’lum shaxs Hazorasp universal savdo kompleksida joylashgan savdo do‘koniga kirib, do‘konda boshqa xaridorlar ham savdo qilayotganidan foydalanib, kassadagi jami 2,5 million so‘m pulni olib, hodisa joyidan yashiringan.

Olib borilgan tergov-tezkor harakatlari natijasida mazkur jinoyatni Hazorasp tumanida yashovchi muqaddam joriy yilning 15-mart kuni JIB Hazorasp tuman sudi tomonidan Jinoyat kodeksning 169-moddasi 3-qismi “a” bandi (o‘g‘irlik) bilan aybli deb topilgan va 3 yil muddatga ozodlikni cheklash jazosi tayinlangan 37 yoshli J.Z. (ayol) tomonidan sodir etgani aniqlanib, undan 2,5 million so‘m pullar ashyoviy dalil sifatida rasmiylashtirib olingan.

Mazkur holat yuzasidan J.Z.ga nisbatan Jinoyat kodeksining 169-moddasi 3-qismi “b” bandi (o‘g‘irlik) bilan jinoyat ishi qo‘zg‘atilgan. Olib borilgan dastlabki tergov natijasiga ko‘ra, J.Z.ga nisbatan Jinoyat kodeksining 169-moddasi 3-qismi “b” bandi bilan aybdor deb topilib,  homiladorligini inobatga olgan holda, unga nisbatan ehtiyot chorasi sifatida “munosib hulq-atvorda bo‘lish to‘g‘risida tilxat” tanlanib, jinoyat ishi ayblov xulosasi bilan mazmunan ko‘rib chiqish uchun JIB Hazorasp tuman sudiga yuborilgan.