24-aprel kuni Silk Avia aviakompaniyasi Toshkent—Samarqand—Toshkent yo‘nalishi bo‘yicha ATR 72-600 samolyoti bortida o‘zining ilk ko‘rgazmali parvozini amalga oshirdi, deb xabar bermoqda “Daryo” muxbiri.
.jpg)
Yo‘lovchilar ishtirokidagi birinchi reysdan avval aviakompaniyaning ochilish marosimi bo‘lib o‘tdi. Mahalliy aviaqatnovlar terminalida bo‘lib o‘tgan marosimni Uzbekistan Airports aksiyadorlik jamiyati boshqaruvi raisi Ra’no Jo‘rayeva ochib berdi.
“Mintaqaviy aviakompaniya O‘zbekistonda nafaqat aeroportlar tarmog‘ini rivojlantirish, balki turizmni rivojlantirish va ishbilarmonlik faolligini rag‘batlantirish bo‘yicha katta mexanizmning asosiy qismi hisoblanadi. Bu ulkan mexanizmni harakatlanishiga imkon beruvchi muhim kichik tafsilot. U hududlarni bir-biriga bog‘lash, yo‘lovchilarni A nuqtadan B nuqtaga o‘z vaqtida, tez va arzon yetkazib berish funksiyalarini o‘z zimmasiga oladi. Buni, masalan, Toshkentdan Urganchga uchib, yo'lda Samarqand yoki Buxoroda to'xtab, yo'lovchilarni qoldirib, olib ketuvchi havo taksisi deb atash mumkin. Biz O‘zbekistonni bog‘lovchi aviakompaniyani yaratdik, bu bilan masofalar qisqaradi, odamlar esa yaqinroq bo‘ladi”, — dedi Uzbekistan Airports rahbari.
Ochilish marosimida O‘zbekiston tabiiy resurslari vaziri Aziz Abduhakimov va O‘zbekiston transport vaziri o‘rinbosari Jasur Choriyev ham ishtirok etdi. Marosimdan so‘ng mehmonlar va ommaviy axborot vositalari vakillari Toshkent—Samarqand yo‘nalishi bo‘yicha US-131 ko‘rgazmali reysiga yo‘l oldi.
Samarqandga yetib kelgan samolyot an’anaviy tarzda suv arkasi bilan kutib olindi. Samarqanddagi tadbirdan so‘ng reys yo‘lovchilari US-132 reysi bilan Toshkentga jo‘nab ketdi.
Ma’lumot uchun, 20-aprel kuni Silk Avia havo operatori sertifikatini olgan va to‘rt kun davomida ATR instruktorlari tomonidan aviakompaniya ekipajlarini ishga tushirish uchun texnik parvozlarni amalga oshirgan. 25-apreldan boshlab aviakompaniya muvofiq muntazam qatnovlarni boshladi.
Izoh (0)