Хоразмдаги бозорда ҳомиладор аёл ўғирлик қилди

Хоразм вилояти Ҳазорасп туманидаги бозорда 23 март куни ҳомиладор аёл ўғирлик қилди. Бу ҳақда Тергов департаменти ахборот хизмати хабар берди.

Қайд этилишича, шу куни номаълум шахс Ҳазорасп универсал савдо комплексида жойлашган савдо дўконига кириб, дўконда бошқа харидорлар ҳам савдо қилаётганидан фойдаланиб, кассадаги жами 2,5 миллион сўм пулни олиб, ҳодиса жойидан яширинган.

Олиб борилган тергов-тезкор ҳаракатлари натижасида мазкур жиноятни Ҳазорасп туманида яшовчи муқаддам жорий йилнинг 15 март куни ЖИБ Ҳазорасп туман суди томонидан Жиноят кодекснинг 169-моддаси 3-қисми “а” банди (ўғирлик) билан айбли деб топилган ва 3 йил муддатга озодликни чеклаш жазоси тайинланган 37 ёшли Ж.З. (аёл) томонидан содир этгани аниқланиб, ундан 2,5 миллион сўм пуллар ашёвий далил сифатида расмийлаштириб олинган.

Мазкур ҳолат юзасидан Ж.З.га нисбатан Жиноят кодексининг 169-моддаси 3-қисми “б” банди (ўғирлик) билан жиноят иши қўзғатилган. Олиб борилган дастлабки тергов натижасига кўра, Ж.З.га нисбатан Жиноят кодексининг 169-моддаси 3-қисми “б” банди билан айбдор деб топилиб,  ҳомиладорлигини инобатга олган ҳолда, унга нисбатан эҳтиёт чораси сифатида “муносиб ҳулқ-атворда бўлиш тўғрисида тилхат” танланиб, жиноят иши айблов хулосаси билан мазмунан кўриб чиқиш учун ЖИБ Ҳазорасп туман судига юборилган.