O‘zbekistondagi 10 ta oliy ta’lim muassasasi rahbar va professor-o‘qituvchilari Finlyandiyada malaka oshirish kurslarida qatnashmoqda. Bu haqda Oliy ta’lim, fan va innovatsiyalar vazirligi axborot xizmati xabar berdi.
Ma’lum qilinishicha, 25-aprel–7-may kunlari vazirlik, Finlyandiyaning O‘zbekistondagi faxriy konsulligi, Xalqaro Nordik universiteti, Finlandiyaning Helsinki, Jyvaskyla, Kareliya va JAMK amaliy fanlar hamda pedagogika institutlari bilan hamkorlikda ta’lim jarayoni ishtirokchilari uchun malaka oshirish kursi tashkil etilmoqda.
Kurs “Finlyandiya ta’lim tizimini o‘rganishning o‘ziga xos jihatlari” mavzusida bo‘lib, unda O‘zbekistonda 10 ta pedagogika oliy ta’lim muassasasining 25 nafar rahbar-xodimlari va professor-o‘qituvchilari ishtirok etmoqda.
24-aprel kuni Xalqaro Nordik universitetida ushbu malaka oshirish safaroldi seminar-trening o‘tkazilib, kurs mashg‘ulotlaridan ko‘zlangan maqsad va vazifalar, oliy ta’limdagi yangilanishlar, innovatsion yondashuvlar haqida o‘zaro fikr almashildi. Shuningdek, finlandiyalik ekspert Petri Lounaskopri Finlandiya ta’lim tizimi va o‘qitish metodikasi bo‘yicha ma’lumotlar berdi.
25-apreldan e’tiboran Finlandiyaning Jyväskylä universitetida trening ishtirokchilari uchun 2 haftalik malaka oshirish boshlandi. Jyväskylä universiteti faoliyati misolida oliy ta’lim standartlari, malaka talablari, o‘quv reja, fan dasturlari, kredit modul tizimi va mustaqil ta’lim, raqamlashtirish jarayonlari, o‘qitish metodikasi va interaktiv metodlarni qo‘llash kabi dolzarb mavzular o‘rganilmoqda.
Bundan tashqari, kurs davomida dasturga muvofiq Finlandiya universitetlari va maktablari, kutubxonalarga tashrif buyurilishi, ta’lim muassasalarida o‘quv jarayoni, xususan uzluksiz ta’limda uzviylikni ta’minlash, kredit modul tizimi va mustaqil ta’limni tashkil etish mexanizmlari, ta’limda baholash, o‘quv me’yoriy hujjatlar, ta’lim standartlari, malaka talablari, o‘quv reja va fan dasturlarini ishlab chiqish kabi dolzarb masalalar yuzasidan tajriba orttirishi rejalashtirilgan.
Izoh (0)