Toshkent shahar IIBB ijtimoiy tarmoqlarda 3 yashar qizning o‘limi holati yuzasidan tarqalgan videomurojaatga munosabat bildirdi.
Qayd etilishicha, 25-aprel kuni 27 yoshli D.U. Sergeli tumani IIO FMBga ariza bilan murojaat qilib, sinfdoshi Sh.N.ga voyaga yetmagan farzandi, 2020-yilda tug‘ilgan S.U.ni enagalik qilishi uchun topshirganini, lekin farzandi uning xonadonida vafot etganini maʼlum qilgan.
Tekshiruv jarayonida Sh.N. qizcha 24-aprelda yerto‘laga tushish zinasidan yiqilib tushganini, biroq o‘rnidan turib yana o‘ynab ketgani sababli uning onasiga bu haqida xabar bermaganini aytgan. Shuningdek, u shifokorlarga ham S.U.ga tibbiy yordam ko‘rsatishi uchun murojaat qilmagan. 25-aprel kuni soat 10:00 larda esa S.U. xushidan ketib yiqilgan va tez tibbiy yordam xodimlari kelguniga qadar vafot etgan.
Marhumaning o‘lim sababini aniqlash maqsadida sudga oid tibbiyot ekspertizasi tayinlangan.
Mazkur holat yuzasidan Sergeli tumani IIO FMB tomonidan Jinoyat kodeksining 117-moddasi (xavf ostida qoldirish) bilan jinoyat ishi qo‘zg‘atilgan. Gumon qilinuvchi Sh.N. protsessual tartibda ushlangan. Tergov davom etmoqda.
11-aprel kuni Toshkentning Mirobod tumanidagi 110-maktabda 8-sinf o‘quvchisi vafot etgani to‘g‘risida xabar berilgandi. Maktab kuzatuv kamerasi videoyozuvlari o‘rganilganda, hodisa joyida janjal yoki kelishmovchilik bo‘lmagani aniqlangan. Shuningdek, Toshkent viloyati Yangiyo‘l shahrida 12-aprel kuni 21 yoshli yigit sport klubida vafot etgan.
Izoh (0)