Surxondaryo viloyati IIB Denov tuman “Katta karshi” mahallasida onasi tomonidan ayovsiz kaltaklangan qizchaning holati aks etgan videoga rasmiy munosabat bildirdi.
Ma’lum qilinishicha, holat yuzasidan Denov tuman Ichki ishlar boshqarmasi tomonidan surishtiruv ishlari olib borilgan. Aniqlanishicha, tumanda yashovchi M.A.ismli ayolning X.S. ismli qizi 22-aprel kuni soat 13:00 larda ko‘chaga o‘rtoqlari bilan o‘ynash maqsadida chiqqan. Oradan biroz vaqt o‘tganidan keyin qiz onasi uni chaqirganini eshitib, qo‘rqqanidan yashiringan. Ayol qizini taxminan 40 daqiqa ko‘chadan qidirgan va u topilganidan keyin uyiga olib kirib, tayoqcha bilan urib, kaltaklagan.
Hozirgi vaqtda X.S. ismli qiz Denov tuman markaziy kasalxonasida davolanib kelmoqda.
Ushbu holat yuzasidan, Denov tumani IIB huzuridagi Tergov bo‘limi tomonidan tergovga qadar tekshiruv harakatlari olib borilmoqda. Tergovga qadar tekshiruv harakatlari Surxondaryo viloyati Ichki ishlar boshqarmasi tomonidan nazoratga olingan.
Mart oxirlarida Toshkent shahar Yangihayot tumanida sportchi erkak o‘z xotini va bolasini ayovsiz kaltaklagani haqida xabar berilgan edi. Keyinroq mazkur holat bo‘yicha yangi tafsilotlar ochiqlangan. Shuningdek, Samarqandda farzandini qiynoqqa solgan ayolga nisbatan jinoyat ishi qo‘zg‘atilgandi.
Izoh (0)