Xitoy yetakchisi Si Szinpin va Ukraina prezidenti Vladimir Zelenskiy 26-aprel kuni telefon orqali suhbatlashdi, bu ikki yetakchi o‘rtasida Rossiyaning Ukrainaga bostirib kirishidan keyin birinchi ma’lum bo‘lgan muloqotdir. Bu haqda The New York Times xabar berdi.
Zelenskiy Xitoy yetakchisi bilan suhbat “uzoq va mazmunli bo‘lganini” aytdi. Ukraina prezidenti mazkur muloqot ikki tomonlama munosabatlar rivojiga kuchli turtki berishini qayd etdi.
Xitoy davlat axborot vositalarining xabar berishicha, ikki yetakchi “Ukraina inqirozi” va xalqlarining ikki tomonlama munosabatlarini muhokama qilgan. Xitoy Rossiya bilan ziddiyatni hal qilish uchun Ukrainaga maxsus vakilini yuboradi. Maxsus vakil mojaroni siyosiy yo‘l bilan hal qilish bo‘yicha chuqur aloqa o‘rnatish uchun boshqa davlatlarga ham tashrif buyuradi.
“Xitoyning Ukraina bilan munosabatlarni rivojlantirish istagi izchil va aniq. Xalqaro vaziyat qanday bo‘lmasin, Xitoy Ukraina bilan o‘zaro manfaatli ikki tomonlama hamkorlikni rivojlantirishga tayyor”, — degan Si Szinpin.
Rossiyaning munosabati
Rossiya Tashqi ishlar vazirligi Pekinning muzokaralarga ko‘maklashish istagini qayd etdi, biroq muammo, TIV matbuot kotibi Mariya Zaxarovaning ta’kidlashicha, “yaxshi rejalar yo‘qligida emas”.
“Hozircha Kiyev rejimi Ukraina inqirozini siyosiy va diplomatik yo‘l bilan hal qilishga qaratilgan har qanday oqilona tashabbuslarni rad etishini namoyish etmoqda va oxir-oqibat muzokaralarga rozilik ultimatumlarga olib keladi.
Ukraina hukumati va ularning G‘arb kuratorlari allaqachon tinchlik tashabbuslarini barbod qilish qobiliyatini namoyish qilgan. Shunday qilib, tinchlikka bo‘lgan har qanday da’vatlarni Vashington tomonidan nazorat qilinadigan qo‘g‘irchoqlar munosib qabul qilishi dargumon”, — degan Zaxarova.
Izoh (0)