Birlashgan Millatlar Tashkiloti bosh kotibi tashkilot shtab-kvartirasining joylashuvi to‘g‘risida qaror qabul qilish vakolatiga ega emas, buni BMTga a’zo davlatlar hal qilishi kerak. BMT rahbarining matbuot kotibi Stefan Dyujarrik tashkilot bosh ofisini Nyu-Yorkdan ko‘chirish taklifi haqidagi savollarga shunday javob berdi.
“BMT shtab-kvartirasining qayerda joylashishi yoki yig‘ilishlar qayerda o‘tkazilishi masalasi bosh kotibning emas, balki aʼzo davlatlarning qarori”, — deya javob berdi matbuot kotibi.
Avvalroq Rossiya Tashqi Ishlar vazirligi xalqaro tashkilotlar departamenti direktori Pyotr Ilichev BMT shtab-kvartirasini Nyu-Yorkdan neytralroq nuqtaga, masalan, Jeneva yoki Venaga ko‘chirishni taklif qilgan edi. Bungacha u AQSHni tashkilot shtab-kvartirasi joylashgan davlat maqomi to‘g‘risidagi kelishuvga rioya qilmayotganlikda ayblagan.
Rossiya tashqi ishlar vaziri Sergey Lavrov ham bu fikrni qo‘llab-quvvatladi. “Menimcha, bu yaxshi bo‘lardi”, — deb javob berdi Lavrov jurnalistlarning hozir buning vaqtimi degan savoliga.
Shveysariya TIV vakili Paola Cherezetti BMT shtab-kvartirasini Jeneva yoki Venaga ko‘chirish g‘oyasini izohlar ekan avvalo, bunday qarorning samaradorligini baholash talab etilishini aytdi.
Aprel oyida Birlashgan Millatlar Tashkiloti Xavfsizlik kengashiga Rossiya raislik qilmoqda. Rossiya tashqi ishlar vaziri Sergey Lavrov boshchiligidagi delegatsiya 24 va 25-aprel kunlari BMT Xavfsizlik kengashi majlislarida ishtirok etish uchun AQSHga bordi. Ammo AQSH Lavrovga Nyu-York safarida hamrohlik qiladigan rossiyalik jurnalistlarga viza bermadi. Lavrov Rossiya buni unutmasligini aytdi. Lavrovning o‘ziga ham uzoq vaqt viza berilmagan.
Izoh (0)