Shvetsiyaning Esreynj kosmodromidan uchirilgan tadqiqotchi raketa kutilmaganda Norvegiyaga qulab tushdi. Bu haqda Shvetsiya kosmik korporatsiyasi xabar berdi.
“Raketa traektoriya bo‘ylab rejalashtirilgan hududdan biroz uzoqroqqa, g‘arbga uchib ketdi va parvozni tugatgandan so‘ng 15 kilometr Norvegiya ichkarisiga quladi”, — deyiladi korporatsiya bayonotida.
Qurilma 250 kilometr balandlikka ko‘tarilgan, u yerda nol tortishish kuchida mikrogravitatsiya tajribalari o‘tkazilgan. Tashkilot ma’lumotlariga ko‘ra, raketa va unga ortilgan foydali yuk rejalashtirilgan qo‘nish joyidan taxminan 40 kilometr shimoli-g‘arbda joylashgan tog‘ tizmasiga, taxminan 1000 metr balandlikdagi joyga qulagan. “Foydali yukni olib chiqish bo‘yicha ishlar olib borilmoqda. Noodatiy parvoz traektoriyasining texnik tafsilotlarini aniqlash bo‘yicha tekshiruv boshlangan”, — deyiladi Shvetsiya kosmik korporatsiyasi xabarida.
Norvegiya Tashqi ishlar vazirligi NRK’ga ma’lum qilishicha, rasmiylar Norvegiya chegarasidagi har qanday ruxsat etilmagan harakatlarga jiddiy yondashadi. “Bunday raketaning qulashi katta zarar keltirishi mumkin bo‘lgan juda jiddiy hodisa. Chegaraning bu tarzda buzilishi kuzatilganda, aybdorlar Norvegiyaning tegishli organlariga zudlik bilan xabar berishi muhim”, — dedi vazirlik vakili.
Uning aniqlik kiritishicha, Norvegiya hukumatiga raketa qo‘ngan hududga biror zarar yetgani haqida xabar kelib tushmagan. “Bunday raketalarning qoldiqlari yonilg‘i yoki boshqa zaharli moddalar bilan ifloslangan bo‘lishi mumkin. Shuning uchun ruxsat etilmagan shaxslar halokat joyiga yaqinlashmasligi zarur”, — deya ta’kidladi Norvegiya TIV vakili.
Parvoz amalga oshirilgan Esreynj kosmik markazi rahbarining aytishicha, Norvegiya tomoni voqea haqida xabardor qilingan. Uning qo‘shimcha qilishicha, Norvegiyaga qulagan raketada 300 kilogrammlik foydali yuk bor.
Izoh (0)