AQSHning Demokratik va Respublikachi partiyalari kongressmenlari AQSH Kongressi Vakillar palatasiga Ukrainadagi urushni mamlakat 1991-yilgi chegaralariga qaytishi bilan yakunlashni talab qiluvchi rezolyutsiyani kiritdi, deb xabar bermoqda Yahoo News.
Hujjatda aytilishicha, “AQSH siyosati shundan iboratki, Ukraina bosqinni yengib, 1991-yilgi xalqaro tan olingan chegaralarini tiklashi kerak”, ya’ni Rossiya tomonidan anneksiya qilingan Qrim va boshqa hududlar qaytarib olinishi zarur.
Rezolyutsiya, shuningdek, Ukrainani NATOga qo‘shishga chaqiradi. Bundan tashqari, hujjatda Rossiya tovon puli to‘lashi, Kreml rasmiylari esa harbiy jinoyatlar uchun sudga tortilishi kerakligi aytiladi.
Hujjat Kongressning “Xelsinki komissiyasi” (ushbu komissiya 1976-yilda SSSRga xalqaro shartnomalarga rioya qilishda yordam berish uchun tuzilgan. Sovet Ittifoqi parchalanganidan keyin komissiya Rossiya masalalari bilan shug‘ullanmoqda) a’zolari bo‘lgan respublikachi Jo Uilson va demokrat Stiv Koen tomonidan tayyorlangan. Hujjat Vakillar palatasida ovozga qo‘yilishidan oldin Vakillar palatasining Tashqi ishlar qo‘mitasida ko‘rib chiqiladi.
“Xelsinki komissiyasi” hisobotida aytilishicha, 25-aprel kuni Kapitoliy yaqinida Ukrainaning o‘nlab tarafdorlari yig‘ilgan va ular rezolyutsiyaning Kongressga kiritilishini olqishlagan. Kongress binosi yoniga kelganlar orasida Ukrainaning uchinchi prezidenti Viktor Yushenko ham bor edi.
Today, @RepJoeWilson, @RepCohen, @RepMarcyKaptur welcomed dozens of #Ukraine supporters to the Capitol to mark the introduction of the Ukrainian Victory Resolution. Special thanks to former President of Ukraine Yushchenko & @razomforukraine. pic.twitter.com/pIPHIo9UOu
— U.S. Helsinki Commission (@HelsinkiComm) April 25, 2023
“Biz 1939-yil 1-sentabrdagi xatoni takrorlamasligimiz kerak”, — dedi rezolyutsiya homiysi Jo Uilson Adolf Gitler Polshaga bostirib kirganiga ishora qilib.
Ukraina prezidenti ofisi rahbarining maslahatchisi Mixail Podolyak rezolyutsiya kiritilishini olqishladi. Yahoo News bilan suhbatda u hujjatni “ajoyib” deb atadi. Ukrainaning AQSHdagi elchisi Oksana Markarova Facebook’da kongressmenlarga “Ukrainaga yordamni kuchaytirishdagi yetakchiligi va ikki partiyaning umumiy g‘alaba haqidagi qarashlari uchun” minnatdorlik bildirdi.
Izoh (0)