Хитой етакчиси Си Цзиньпин ва Украина президенти Владимир Зеленский 26 апрель куни телефон орқали суҳбатлашди, бу икки етакчи ўртасида Россиянинг Украинага бостириб киришидан кейин биринчи маълум бўлган мулоқотдир. Бу ҳақда The New York Times хабар берди.
Зеленский Хитой етакчиси билан суҳбат “узоқ ва мазмунли бўлганини” айтди. Украина президенти мазкур мулоқот икки томонлама муносабатлар ривожига кучли туртки беришини қайд этди.
Хитой давлат ахборот воситаларининг хабар беришича, икки етакчи “Украина инқирози” ва халқларининг икки томонлама муносабатларини муҳокама қилган. Хитой Россия билан зиддиятни ҳал қилиш учун Украинага махсус вакилини юборади. Maxсус вакил можарони сиёсий йўл билан ҳал қилиш бўйича чуқур алоқа ўрнатиш учун бошқа давлатларга ҳам ташриф буюради.
“Хитойнинг Украина билан муносабатларни ривожлантириш истаги изчил ва аниқ. Халқаро вазият қандай бўлмасин, Хитой Украина билан ўзаро манфаатли икки томонлама ҳамкорликни ривожлантиришга тайёр”, — деган Си Цзиньпин.
Россиянинг муносабати
Россия Ташқи ишлар вазирлиги Пекиннинг музокараларга кўмаклашиш истагини қайд этди, бироқ муаммо, ТИВ матбуот котиби Мария Захарованинг таъкидлашича, “яхши режалар йўқлигида эмас”.
“Ҳозирча Киев режими Украина инқирозини сиёсий ва дипломатик йўл билан ҳал қилишга қаратилган ҳар қандай оқилона ташаббусларни рад этишини намойиш этмоқда ва охир-оқибат музокараларга розилик ультиматумларга олиб келади.
Украина ҳукумати ва уларнинг Ғарб кураторлари аллақачон тинчлик ташаббусларини барбод қилиш қобилиятини намойиш қилган. Шундай қилиб, тинчликка бўлган ҳар қандай даъватларни Вашингтон томонидан назорат қилинадиган қўғирчоқлар муносиб қабул қилиши даргумон”, — деган Захарова.
Изоҳ (0)