AQSH Milliy xavfsizlik kengashi matbuot kotibi Jon Kirbining ma’lum qilishicha, “Tolibon” 2021-yil avgust oyida Kobulda portlash uyushtirgan ISHID terror tashkilotining afg‘on bo‘linmasi jangarisini yo‘q qilgan. Bu haqda Reuters xabar bermoqda.
Kobul aeroportidagi teraktda yaralangan amerikalik askarlarni Germaniyadagi shifoxonada qabul qilishmoqda, 2021-yil 27-avgust.
Kobul aeroportidagi portlash 2021-yilning 26-avgustida, Afg‘onistonda “Tolibon” hokimiyat tepasiga kelganidan so‘ng, AQSH qo‘shinlari amerikaliklar va afg‘onlarni evakuatsiya qilayotgan vaqtda sodir bo‘lgan. O‘shanda 13 nafar amerikalik askar va o‘nlab tinch aholi halok bo‘lgan.
ISHIDning Afg‘onistondagi bo‘linmasi “Viloyati Xuroson” Afg‘onistonda “Tolibon”ga qarshi kurashmoqda. Guruh jangarilari ilk bor 2014-yilda Afg‘oniston sharqida paydo bo‘lgan, keyin esa boshqa hududlarga bostirib kirgan.
Kobul aeroportidagi teraktdan so‘ng Amerikaning MQ-9 Reaper uchuvchisiz uchog‘i terrorchilikda gumon qilingan shaxsga zarba berib, o‘n nafar tinch aholining o‘limiga sabab bo‘lgan edi. Dastlab AQSH xavfli terrorchini o‘ldirganini da’vo qilgan, biroq keyinroq xayriya tashkilotida ishlaydigan xodimni jangari bilan adashtirganini tan olgan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)