Shavkat Mirziyoyev va Vladimir Putin 26-aprel kuni telefon orqali muloqot qildi, deb xabar bermoqda Prezident matbuot xizmati.
Qayd etilishicha, suhbat davomida amaliy hamkorlikni kengaytirish, savdo munosabatlari sur’atini ta’minlash va yetakchi korxonalarning kooperatsiya loyihalarini qo‘llab-quvvatlash masalalari ko‘rib chiqildi.
Avtomobilsozlik, temiryo‘l transporti, farmasevtika, kimyo sanoati va boshqa ustuvor tarmoqlarda o‘zaro manfaatli hamkorlikni yanada kengaytirish muhimligi qayd etildi. Sanoat ipotekasi, klasterlar, industrial rivojlanish jamg‘armasi kabi vositalarni rivojlantirish borasidagi ilg‘or tajribani o‘rganishdan manfaatdorlik bildirildi.
Ikki mamlakat yetakchilari shu kunlarda o‘tayotgan “Innoprom. Markaziy Osiyo” xalqaro sanoat ko‘rgazmasining samarali natijalarini katta mamnuniyat bilan qayd etdi. Ushbu tadbirda 35 mamlakat biznesining 5 ming nafardan ziyod vakili ishtirok etmoqda.
Bundan tashqari, mintaqaviy hamkorlikning dolzarb jihatlari yuzasidan ham fikr almashilgan.
Muloqot yakunida O‘zbekiston prezidenti Konstitutsiya bo‘yicha bo‘lajak referendumning Rossiya hududida o‘tkazilishiga ko‘rsatilayotgan ko‘mak uchun Vladimir Putinga minnatdorlik bildirgan.
Shavkat Mirziyoyev bundan bir kun avval “Innoprom. Markaziy Osiyo” xalqaro sanoat ko‘rgazmasida Rossiya delegatsiyasiga boshchilik qilayotgan Rossiya hukumati raisining o‘rinbosari, sanoat va savdo vaziri Denis Manturovni qabul qilgandi. Sanoat ishlab chiqarishini qo‘llab-quvvatlashda Rossiya tajribasini joriy etishga qiziqish bildirilib, qo‘shma loyihalarni ilgari surishning institutsional mexanizmlarini kuchaytirish zarurligi qayd etilgandi.
Izoh (0)