O‘zbekiston va Italiya o‘rtasidagi munosabatlarni yanada kengaytirish masalalari ko‘rib chiqildi

Shavkat Mirziyoyev 26-aprel kuni O‘zbekistonga tashrif buyurgan Italiya mudofaa vaziri Gvido Krozettoni qabul qildi.

Prezident matbuot xizmatining xabar qilishicha, O‘zbekiston va Italiya o‘rtasidagi ko‘p qirrali munosabatlarni yanada kengaytirish masalalari ko‘rib chiqildi.

Uchrashuv avvalida mudofaa idorasi rahbari O‘zbekiston yetakchisiga Italiya prezidenti Serjo Mattarella va Vazirlar kengashi raisi Jorji Melonining salomi va eng ezgu tilaklarini yetkazdi. Ikki tomonlama hamkorlikning bugungi darajasi mamnuniyat bilan qayd etildi.

Suhbatda energetika, shu jumladan, qayta tiklanuvchi energetika, logistika, qishloq xo‘jaligi va boshqa tarmoqlarda amaliy hamkorlik qilish masalalariga alohida e’tibor qaratildi.

Davlat rahbari O‘zbekiston va Italiya mudofaa idoralari o‘rtasida sheriklik munosabatlarini yo‘lga qo‘yish muhimligini ta’kidladi.

Mintaqaviy barqarorlik va xavfsizlikni ta’minlash, jumladan, Afg‘onistondagi vaziyatni tinch yo‘l bilan tartibga solish masalalari yuzasidan ham fikr almashildi.

Italiya mudofaa vaziri Krozetto Gvido prezident qabulidan avval O‘zbekiston mudofaa vaziri general-leytenant Bahodir Qurbonov bilan ham uchrashdi. Uchrashuvda xavfsizlik va mudofaa sohasidagi hamkorlikning bugungi holati, uning rivojlanish istiqbollari muhokama qilingan.