Namangan viloyatida talaba qizni ta’qib qilib, uni qo‘rqitib kelgan shaxs javobgarlikka tortildi. Bu haqda Oliy Majlisning Inson huquqlari vakili (ombudsman) axborot xizmati xabar berdi.
Qayd etilishicha, ombudsman ishonch telefoniga Namangan viloyati Chortoq tumanida yashovchi talaba qiz nomaʼlum bir shaxs tomonidan doimiy ravishda telefon orqali qo‘rqitib bezovta qilinayotgani bo‘yicha murojaat qilgan. Otasi chet davlatiga ishlash uchun ketgan murojaatchi qizning yozishicha, yigit uni va dugonalarini ko‘p bora bezovta qilgan. Hatto onasini o‘ldirish bilan ham qo‘rqitgan.
Mazkur murojaat zudlik bilan ombudsmanning Namangan viloyatidagi mintaqaviy vakiliga yuborilib, Chortoq tumani Ichki ishlar bo‘limi xodimlari bilan birgalikda ko‘rib chiqilgan.
Olib borilgan o‘rganishlar davomida murojaatchini qo‘rqitib kelgan shaxs shu tumanda yashovchi, 1991-yilda tug‘ilgan A.O.ekani aniqlanib, unga nisbatan tegishli hujjatlar rasmiylashtirilgan va ish sudga oshirilgan.
Jinoyat ishlar bo‘yicha Chortoq tuman sudining tegishli hukmiga ko‘ra, A.O.ga nisbatan eng kam oylik ish haqining 5 barobari miqdorida (1,5 million so‘m) jarima jazosi tayinlandi.
Shuningdek, aybdor A.O. dan murojaatchi qizni qayta bezovta qilmasligi to‘g‘risida tilxat olingan.
Bir necha kun oldin Toshkent shahar Mirobod tumanida erkak 17 yoshli qizga tegajog‘lik qilgani aks etgan video tarqalgan edi. Ushbu qizning otasi IIB xodimlaridan aybdorga qattiq chora ko‘rilishini so‘ragan.
Izoh (0)