Наманган вилоятида талаба қизни таъқиб қилиб, уни қўрқитиб келган шахс жавобгарликка тортилди. Бу ҳақда Олий Мажлиснинг Инсон ҳуқуқлари вакили (омбудсман) ахборот хизмати хабар берди.
Қайд этилишича, омбудсман ишонч телефонига Наманган вилояти Чортоқ туманида яшовчи талаба қиз номаълум бир шахс томонидан доимий равишда телефон орқали қўрқитиб безовта қилинаётгани бўйича мурожаат қилган. Отаси чет давлатига ишлаш учун кетган мурожаатчи қизнинг ёзишича, йигит уни ва дугоналарини кўп бора безовта қилган. Ҳатто онасини ўлдириш билан ҳам қўрқитган.
Мазкур мурожаат зудлик билан омбудсманнинг Наманган вилоятидаги минтақавий вакилига юборилиб, Чортоқ тумани Ички ишлар бўлими ходимлари билан биргаликда кўриб чиқилган.
Олиб борилган ўрганишлар давомида мурожаатчини қўрқитиб келган шахс шу туманда яшовчи, 1991 йилда туғилган А.О.экани аниқланиб, унга нисбатан тегишли ҳужжатлар расмийлаштирилган ва иш судга оширилган.
Жиноят ишлар бўйича Чортоқ туман судининг тегишли ҳукмига кўра, А.О.га нисбатан энг кам ойлик иш ҳақининг 5 баробари миқдорида (1,5 миллион сўм) жарима жазоси тайинланди.
Шунингдек, айбдор А.О. дан мурожаатчи қизни қайта безовта қилмаслиги тўғрисида тилхат олинган.
Бир неча кун олдин Тошкент шаҳар Миробод туманида эркак 17 ёшли қизга тегажоғлик қилгани акс этган видео тарқалган эди. Ушбу қизнинг отаси ИИБ ходимларидан айбдорга қаттиқ чора кўрилишини сўраган.
Изоҳ (0)