Toshkent shahar Mirobod tumanida erkak 17 yoshli qizga tegajog‘lik qilgani aks etgan video tarqalgan edi. Ushbu qizning otasi IIB xodimlaridan aybdorga qattiq chora ko‘rilishini so‘radi.
Shahar Ichki ishlar bosh boshqarmasining bergan maʼlumotlariga ko‘ra, holat 19-aprel kuni soat 12:50 larda 2005-yilda tug‘ilgan Z.B. Mirobod tumani, Inoqobod ko‘chasida uyiga qaytayotgan vaqtida sodir bo‘lgan. Uning orqasidan 1997-yilda tug‘ilgan, Samarqand viloyati Oqdaryo tumanida yashovchi O.O. kelib, quchoqlab, yuzidan o‘pib, qo‘yib yuborgan va voqea joyidan qochib ketgan. O‘tkazilgan tezkor tadbir natijasida O.O. ushlangan.
Qizning otasi voqeani tongda rafiqasidan eshitganini, shundan so‘ng IIBga murojaat qilganini aytdi. Uning so‘zlariga ko‘ra, hozirda qizi kuchli stress holatida.
“Qizim maktab o‘quvchisi. 19-aprel kuni maktabdan qaytayotganda qizimga orqa tomondan notanish fuqaro kelib, og‘zini berkitib, bo‘ynidan bo‘g‘ib, yiqitgan. Ushbu holat bo‘yicha bugun ertalab soat 4:00 larda turmush o‘rtog‘imdan eshitdim. Qizim hozir stress holatda. Videoda qarasangiz orqada kelayotganida ko‘rmay qolgan, tanimaydi. Yaxshi ham baqirgani uchun qochib ketgan, hech narsasini olmagan. Tuman IIBga borib, murojaat qildim. O‘sha bolaga nisbatan qattiq chora ko‘rishlarini so‘rab qolardim”, — deydi qizning otasi.
Izoh (0)