DXX Chegara qo‘shinlari harbiy xizmatchisining qonuniy talablarini bajarmaslikka daʼvat qilganlik uchun javobgarlik belgilandi

Prezident tomonidan imzolangan qonun bilan Maʼmuriy javobgarlik to‘g‘risidagi kodeksga qo‘shimcha va o‘zgartishlar kiritildi, deb xabar beradi Telegram’dagi “Huquqiy axborot” kanali.

Shunga ko‘ra:

Davlat xavfsizlik xizmati Chegara qo‘shinlari harbiy xizmatchisining huquqbuzarliklarni to‘xtatish, hujjatlarni tekshirish uchun taqdim etish, ko‘rsatilgan muddatda Davlat xavfsizlik xizmati Chegara qo‘shinlari bo‘linmalariga (huquqni muhofaza qiluvchi organlarga) borish yoki ushbu bo‘linmalarda hozir bo‘lish to‘g‘risidagi qonuniy talablarini uzrli sabablarsiz bajarmaslik, transport vositasini to‘xtatish, jabrlanuvchilarga yordam ko‘rsatish haqidagi qonuniy talablarini bajarmaslik yoxud Davlat xavfsizlik xizmati Chegara qo‘shinlari harbiy xizmatchisining qonuniy talablariga boshqacha tarzda bo‘ysunmaslik –

• BHMning 1 baravaridan 12 baravarigacha (3,6 million so‘m) miqdorda jarima solishga sabab bo‘ladi.

Shuningdek:

Davlat xavfsizlik xizmati Chegara qo‘shinlari harbiy xizmatchisining o‘z xizmat vazifalarini bajarishi bilan bog‘liq qonuniy talablarini bajarmaslikka omma oldida har qanday shaklda daʼvatlar qilish, shuningdek, Davlat xavfsizlik xizmati Chegara qo‘shinlari harbiy xizmatchilariga ommaviy ravishda bo‘ysunmaslikni keltirib chiqarish maqsadida bila turib soxta uydirmalarni tarqatish –

• BHMning 3 baravaridan 20 baravarigacha (6 million so‘m) miqdorda jarima solishga yoki 15 sutkagacha maʼmuriy qamoqqa olishga sabab bo‘ladi.

Qonun rasmiy eʼlon qilingan kundan eʼtiboran kuchga kiradi.

Senatning 39-yalpi majlisida “O‘zbekiston Respublikasining Ma’muriy javobgarlik to‘g‘risidagi kodeksiga O‘zbekiston Respublikasining Davlat chegarasini qo‘riqlash va himoya qilishni yanada kuchaytirishga qaratilgan qo‘shimcha va o‘zgartishlar kiritish haqida”gi qonun ko‘rib chiqilgandi. Kodeksning 225-moddasidagi tegishli qismlari, ya’ni chet el fuqarosi yoki fuqaroligi bo‘lmagan shaxsning O‘zbekistonda bo‘lish qoidalari yoki muddatlarini buzishi bilan bog‘liq ma’muriy huquqbuzarliklarni ko‘rib chiqish, shaxsni ma’muriy yo‘l bilan ushlab turish hamda transport vositalarini ushlab turish va ko‘rikdan o‘tkazish vakolati ichki ishlar organlari bilan bir qatorda Davlat xavfsizlik xizmati Chegara qo‘shinlariga ham berish taklif etilgandi.