O‘zbekistonda chegara oldi hududlarda xavfsizlikni ta’minlash maqsadida 120 ta mobil guruh tashkil etildi. Bu haqda 31-oktyabr kuni Senatning Mudofaa va xavfsizlik masalalari qo‘mitasi tomonidan davlat chegarasini himoya qilish borasida o‘tkazilgan davra suhbatida ma’lum qilindi.
DXX Chegara qo‘shinlari, Mudofaa, Ichki ishlar vazirliklari hamda Davlat bojxona qo‘mitasi vakillari ishtirok etgan davra suhbatida qayd etilishicha, O‘zbekiston hududiga turli jangari guruhlar kirib kelishining oldini olish, mamlakatimiz sarhadlarining daxlsizligi va xavfsizligini ta’minlash hamda ijtimoiy-siyosiy va tezkor vaziyatni uzluksiz nazoratga olish ishlarini yanada kuchaytirish maqsadida Davlat xavfsizlik xizmatining Chegara qo‘shinlari, Milliy gvardiya, Ichki ishlar va Mudofaa vazirliklari bilan hamkorlikda joriy yil mart hamda avgust oylarida barcha chegaradosh aholi maskanlarida “Chegara-tozalash” tezkor-profilaktik tadbirlar o‘tkazilgan.
Qo‘shni davlatlarda yuzaga kelayotgan keskin ijtimoiy-siyosiy vaziyatning O‘zbekistonga ta’sirining oldini olish, tezkor-kriminogen va ijtimoiy-siyosiy vaziyat barqarorligini saqlash, aholi tinchligi va osoyishtaligini ta’minlash, turli ko‘rinishdagi jinoyat va huquqbuzarliklarning oldini olish maqsadida Ichki ishlar vazirligi, Davlat xavfsizlik xizmati, Milliy gvardiya va Mudofaa vazirligi xodimlaridan iborat 120 ta “mobil guruhlar” faoliyati tashkil etilgan.
Mudofaa vazirligi, Ichki ishlar vazirligi, Davlat xavfsizlik xizmatining Chegara qo‘shinlari harbiy qismlari xodimlari bilan hamkorlikda cho‘pon, ovchi va o‘rmon xo‘jaligi xodimlarini jalb qilgan holda 2022-yilning o‘tgan davri davomida chegaraoldi, tog‘li va borish qiyin bo‘lgan hududlarda 2 154 marotaba razved-qidiruv tadbirlari o‘tkazilgan.
Izoh (2)
Ҳўкматимизга ва чегарачиларимизга катта рахмет! кеча кундузи службада юришади.
Qirg'iziston bilan chegaralarimizning ko'plab qismida to'siqlar qo'yilmagan. bu hududlarda barcha kuch tuzilmalari hamkorlikda ishlamasa bo'lmaydi. men o'zim chegara yaqinida yashaganim uchun yaxshi bilaman. qo'shnilar tomondan odomlarning noqonuniy o'tish holatlari juda ko'p kuzatiladi.