24-aprel kuni Qozog‘iston Mudofaa vazirligi respublikada Vatan himoyachilari kuni (7-may) va G‘alaba kuniga (9-may) bag‘ishlangan harbiy parad bu yil ham o‘tkazilmasligini ma’lum qildi, deb xabar bermoqda “Daryo”ning Qozog‘istondagi muxbiri.
“Qozog‘istonda 2023-yilda harbiy parad o‘tkazish budjet mablag‘larini tejash, shuningdek, boshqa muammolarni hal qilish zarurati tufayli rejalashtirilmagan. Xususan, ustuvor vazifa — Qozog‘iston Qurolli kuchlari bo‘linmalarining jangovar tayyorgarligi va harakatchanligini talab darajasida saqlash”, — deya xabar berdi Qozog‘iston Mudofaa vazirligi matbuot xizmati.
Shu bilan birga, yaqinlashib kelayotgan bayramlar munosabati bilan harbiy-vatanparvarlik tadbirlari rejalashtirilgani, ular o‘tkazilib, alohida xizmat ko‘rsatgan harbiy xizmatchilarni taqdirlash ko‘zda tutilgani ta’kidlandi.
Ikkinchi jahon urushida halok bo‘lgan qozoq askarlarining xotirasini abadiylashtirish, ularning jasoratlarini ommaviy axborot vositalarida yoritish bo‘yicha ham ishlar tashkil etilgan.
Qozog‘istonda 2022-yilda ham G‘alaba kuni va Vatan himoyachilari kuniga bag‘ishlangan harbiy parad o‘tkazilmagan edi. Mamlakat Mudofaa vazirligi qarorni xuddi shunday — budjet mablag‘larini tejash istagi bilan izohlagan. Qozog‘istonda oxirgi marta harbiy parad 2018-yil 7-may kuni, 2019-yil 9-may kuni o‘tkazilgan. 2020 va 2021-yillarda koronavirus infeksiyasi tarqalish xavfi tufayli hech qanday ommaviy bayramlar o‘tkazilmagan.
Izoh (0)