Qozog‘istonning Qizilo‘rda shahridagi uyda yuz bergan portlash qo‘shni uyning tashqi videokameralariga tushib qoldi. Portlash kuchidan bino tomi “sakrab ketdi”, deb xabar bermoqda “Daryo”ning Qozog‘istondagi muxbiri.
Voqea joyiga zudlik bilan o‘t o‘chiruvchi va qutqaruvchilar yetib kelgan. Ular portlashga ehtimoliy gaz sizib chiqishi sabab bo‘lganini aniqladi. Uy yonib, ba’zi joylari qulab tushgan. Olov yaqin atrofdagi binoni qamrab olgan.
“Daryo” muxbiri bir nafar jabrlanuvchi haqida ma’lumot oldi. U 1984-yilda tug‘ilgan O‘zbekiston fuqarosi Jurabek Po‘latov ekani ma’lum qilindi. Qozog‘iston Favqulodda vaziyatlar departamentining xabar berishicha, erkak oyoq-qo‘llaridagi 1-darajali kuyish bilan shahar shifoxonasiga yetkazilgan.
“O‘zbekiston fuqarosi yuzi, ikki qo‘li va ikkala boldirining ayrim joylaridan termik kuyish jarohatini olgan. Bemorning ahvoli o‘rtacha og‘irlikda”, — deyiladi ko‘p tarmoqli shahar shifoxonasi xabarida.
Voqea joyida Tabiiy ofatlar tibbiyoti markazi, politsiya va gaz ta’minoti tashkiloti xodimlari ham ishlagan.
17-aprel kuni Qozog‘istonning Janao‘zen shahridagi ikki qavatli turar joyda gaz balloni portlab, bino podyezdi qulab tushgan edi, oqibatida to‘rt kishi halok bo‘lgan.
Izoh (0)