Qozog‘istonda 10 yoshli bolaning miyasidan qurtlar olib tashlandi

Qozog‘istonning Chimkent shahrida 10 yoshli bolaning miyasidan qurt olib tashlandi. Bu haqda mahalliy Otyrar nashri xabar berdi.

Ma’lum qilinishicha, bola doimiy bosh og‘rig‘idan shikoyat qilgan. Magnit-rezonans tomografiya yordamida shifokorlar bolada miya exinokokkozini aniqlagan. Bu juda kam uchraydigan kasallik hisoblanadi.

Natijada shifokorlar bolada 2 soat davomida jarrohlik amaliyotini olib borgan. Uning miyasidan 10-15 ga yaqin 15 santimetrgacha bo‘lgan tasmasimon qurtlar olib tashlangan. Bemor 2 kun intensiv terapiyada yotgan, keyin palataga o‘tkazilgan. Bir hafta o‘tgach, bola uyga yuborilgan. Hozirda u shifokorlar nazoratida.

Miyaning exinokokkozi — markaziy asab tizimining kasalligi. Parazitlar tanaga gigiyena qoidalariga rioya qilmaslik oqibatida kiradi. O‘z vaqtida davolanmasa, exinokokkoz o‘limga olib kelishi mumkin.