Kanadada erkak siyosatchilar ayollarni qo‘llab-quvvatlash uchun pushti tufli kiydi (video)

Kanadada erkak siyosatchilar ayollarga nisbatan zo‘ravonlikka qarshi kurashishga chaqirish maqsadida parlamentda pushti poshnali tuflida ko‘rinish berdi. Bu haqda Fox News xabar berdi.

Kanada parlamenti a’zolari ayollarga nisbatan zo‘ravonlik masalasiga e’tibor qaratish maqsadida Ontariodagi ayollar boshpanasi Halton Women’s Place homiyligida o‘tkazilgan “Baland poshnalarda umid” tadbiri doirasida baland poshnali pushti tufli kiygan.

“Jamiyatimizda ayollarga nisbatan zo‘ravonlik hali ham keng tarqalgan. ‘Baland poshnalarda umid’ — bu ayollarga nisbatan zo‘ravonlik haqida xabardorlikni oshiradigan va erkaklarni yechimning bir qismi bo‘lishga undaydigan tadbir. Ushbu muhim ishni qo‘llab-quvvatlash uchun pushti tuflilarni kiyib oldik”, — deydi Kanada transport vaziri Umar Algabra.

“Erkaklar va o‘g‘il bolalarni o‘qitish — bu yechimning bir qismi. Barchamiz gender zo‘ravonlikka barham berishga mas’ulmiz”, — deydi Liberal partiya a’zosi Karina Guld.

Biroq ayollarga nisbatan zo‘ravonlikka qarshi kurashda ushbu qo‘llab-quvvatlashni hamma ham yoqlamagan. AQSH armiyasi maxsus kuchlari faxriysi Jim Xenson “ular erkaklarga o‘xshaydi, lekin ular erkaklar emas” deb yozgan.

Red State bosh muharriri Ben Kyuning aytishicha, bu harakat “zo‘ravonlik holatlarining ko‘payishiga olib kelishi mumkin”.

Kanadalik siyosatchi, Kanada Xalq partiyasi asoschisi va yetakchisi Maksim Berniye Twitter’dagi ayol auditoriyasidan ushbu harakatdan so‘ng o‘zlarini xavfsizroq his qilganmi deya so’ragan.