Канадада эркак сиёсатчилар аёлларни қўллаб-қувватлаш учун пушти туфли кийди (видео)

Канадада эркак сиёсатчилар аёлларга нисбатан зўравонликка қарши курашишга чақириш мақсадида парламентда пушти пошнали туфлида кўриниш берди. Бу ҳақда Fox News хабар берди.

Канада парламенти аъзолари аёлларга нисбатан зўравонлик масаласига эътибор қаратиш мақсадида Онтариодаги аёллар бошпанаси Halton Women’s Place ҳомийлигида ўтказилган “Баланд пошналарда умид” тадбири доирасида баланд пошнали пушти туфли кийган.

“Жамиятимизда аёлларга нисбатан зўравонлик ҳали ҳам кенг тарқалган. ‘Баланд пошналарда умид’ — бу аёлларга нисбатан зўравонлик ҳақида хабардорликни оширадиган ва эркакларни ечимнинг бир қисми бўлишга ундайдиган тадбир. Ушбу муҳим ишни қўллаб-қувватлаш учун пушти туфлиларни кийиб олдик”, — дейди Канада транспорт вазири Умар Алгабра.

“Эркаклар ва ўғил болаларни ўқитиш — бу ечимнинг бир қисми. Барчамиз гендер зўравонликка барҳам беришга масъулмиз”, — дейди Либерал партия аъзоси Карина Гулд.

Бироқ аёлларга нисбатан зўравонликка қарши курашда ушбу қўллаб-қувватлашни ҳамма ҳам ёқламаган. АҚШ армияси махсус кучлари фахрийси Жим Хенсон “улар эркакларга ўхшайди, лекин улар эркаклар эмас” деб ёзган.

Red State бош муҳаррири Бен Кюнинг айтишича, бу ҳаракат “зўравонлик ҳолатларининг кўпайишига олиб келиши мумкин”.

Канадалик сиёсатчи, Канада Халқ партияси асосчиси ва етакчиси Максим Берние Twitter’даги аёл аудиториясидан ушбу ҳаракатдан сўнг ўзларини хавфсизроқ ҳис қилганми, дея сўраган.