Pekin barcha mamlakatlarning suveren maqomini hurmat qiladi, dedi Xitoy Tashqi ishlar vazirligi matbuot kotibi Mao Nin. Vazirlik Xitoyning Fransiyadagi elchisi Lu Shayning Qrimni “aslida Rossiyaniki” deb atagan va sobiq Sovet davlatlarining suverenitetiga shubha bildirgan intervyusiga shunday izoh berdi.
“Tegishli masala bo‘yicha Xitoyning pozitsiyasi o‘zgarmagan. Hududiy suverenitetga kelsak, Xitoyning pozitsiyasi doimo aniq bo‘lib kelgan. Xitoy barcha mamlakatlarning suvereniteti, mustaqilligi va hududiy yaxlitligini hurmat qiladi hamda Birlashgan Millatlar Tashkiloti nizomining maqsad va tamoyillarini qo‘llab-quvvatlaydi”, — dedi TIV vakili.
Gap xitoylik diplomatning Fransiyaning LCI kanaliga bergan intervyusi haqida ketmoqda. Unda Lu Shay Qrim yarimorolini tarixiy jihatdan Rossiyaniki deb atagan. Bundan tashqari, diplomatning so‘zlariga ko‘ra, sobiq Sovet Ittifoqi davlatlari go‘yoki amaldagi xalqaro huquqda hech qanday samarali maqomga ega emas, chunki “birorta ham xalqaro shartnomada ularning suveren davlat sifatidagi maqomi belgilab qo‘yilmagan”.
Xitoy elchisining so‘zlari Latviya, Litva, Estoniya va Ukraina rasmiylarining keskin munosabatiga sabab bo‘ldi. Fransiya Tashqi ishlar vazirligi Lu Shayning so‘zlarini “xavotir bilan e’tiborga olganini” bildirdi va Xitoy rasmiylaridan bu gaplar Pekinning pozitsiyasini aks ettiradimi yoki yo‘qligiga aniqlik kiritishni so‘radi.
Bloomberg nashrining qayd etishicha, Xitoyning Fransiyadagi elchixonasi o‘zining WeChat akkauntida elchi bilan suhbat stenogrammasini o‘chirib tashlagan. Suhbat elchixonaning rasmiy saytida chop etilmagan.
Izoh (0)