Taniqli vayner Xonzoda Do‘stova “Daryo”ning YouTube’dagi kanaliga bergan intervyusida “xashaki” rejissorlar va Sherali Jo‘rayevga yoqmagan parodiyasi haqida gapirdi.
— “Ingliz tilini bilasiz, uning ustiga professional aktrisasiz, nega blogerlik qilib yuribsiz?” deb ko‘p so‘rashadi. Haqiqatan ham, internetga vaynlar olish uchun to‘rt yil tahsil olmaganman. Ammo hozirgi aktyor va aktrisalarning boshqa iloji ham yo‘q. Chunki xashaki rejissorlar ko‘payib ketgan, agar ular ko‘rsatgan yo‘l bo‘ylab harakatlanadigan bo‘lsak, birorta tuzuk rol ijro etolmaymiz. Yolqin To‘ychiyev, Zulfiqor Musoqov yoki Ayub Shahobiddinov kabi rejissorlar har yili film olishavermaydi. Kinoning kulminatsiyasi nima ekanligini bilmaydigan rejissorlar esa oyiga yangi serial olishni “uddalashyapti”. Bir umr bloger bo‘lib qolib ketishni istamayman. 30-40 yoshga kirganimda ham vaynlar olib yurish niyatim yo‘q. Ungacha jiddiyroq sohaning etagidan tutib, bir stolning egasi bo‘lishni istayman, — deydi Xonzoda Do‘stova.
— Pul hamma qatori menga ham kerak, ammo bu pulni ustun ko‘raman deganim emas. Mana, yaqinda bir davlat filmiga taklif qilishdi. Gonorar summasini ham so‘ramay, suratga tushishga rozi bo‘ldim. Chunki aniq bilaman, davlat filmlaridagi kunlik gonorar 200-250 ming so‘m bo‘ladi. Suratga olish ishlari tog‘da bo‘lishini aytishdi. Ayni o‘sha vaqtda 2 000 AQSH dollarlik reklama taklif etishayotgan edi. Menejerim “Shuncha pulga reklama kelyapti”, deyishiga qaramay, film syomkasiga ketdim. Bir necha kunlik syomka uchun 1 million 900 ming so‘m olgan bo‘lsam ham, har holda to‘rt yil bejiz aktrisalikka o‘qimaganimni his qildim. Shunchaki rol ijro etishni istamayman, qiynalib ishlagim keladi. Afsuski, aksariyat rejissorlar ishga nihoyatda yengil yondashadi, — deydi aktrisa Xonzoda Do‘stova.
U suhbat davomida “Aktyor shou”da dadasining yordami bilan ishtirok etgani haqidagi mish-mishlarga o‘z munosabatini bildirdi.
— Institutning ikkinchi kursida o‘qiyotganimda “Aktyor shou”ga taklif etishgan. To‘g‘risi, bu men uchun juda og‘ir sinov bo‘lgan. Ijodiy tomondan qiynalmaganman, ammo otam shouda ishtirok etishimga jiddiy qarshi bo‘lgan. Shunda oldilariga kelib, “Dada, yuzingizni yerga qaratmayman, o‘g‘rilik qilayotganim yo‘q-ku, bir marta imkon bering”, deganman. Shundan keyin indamagan. Ammo ko‘rsatuv tugaguniga qadar 3 oy davomida men bilan umuman gaplashmagan. Sahna ko‘rinishim uchun rekvizit va kiyimlarni olishim uchun pul kerak bo‘lardi, ammo uydagilardan pul so‘rolmasdim. Syomka jarayonlari ba’zan kechgacha davom etardi yoki tayyorgarlik jarayonlari cho‘zilib ketardi. Bu otamga yoqmasdi. Asliddin Do‘stovning qizi ekanimni bilgach, ba’zi insonlar “San’atkorning bolasi-da, otasi hakamlarni gaplashib bergan”, deb noto‘g‘ri gumonga borishdi. Ko‘rsatuvda ishtirok etishimni istamagan inson menga yordam berishi mumkinmi?
Xonzoda Do‘stova shouda O‘zbekiston xalq artisti Sherali Jo‘rayevni parodiya qilgani uchun xonandaning yaqinlari tomonidan tanqid qilingani va chiqishini YouTube tarmog‘idan butunlay o‘chirtirishgani haqida ham so‘zlab berdi.
— Ko‘rsatuv bilan qiziqarli voqealar juda ko‘p bo‘lgan. Shu bilan birga, ko‘ngilxiraliklar ham talaygina. Masalan, tanish-bilishchilikka ko‘p marta yo‘l qo‘yilgan. Rejissor yoqtirgan qizini, Shahzoda Muhammedova stilistlik ham qiladigan aktyorni, boshqa ustozlar esa kursidagi o‘quvchilarni qo‘llab-quvvatlardi. Ularning ichida bitta men begona edim. Qanday obrazda chiqishimizni kompyuter tanlab berardi. Bir marta menga Sherali Jo‘rayev obrazini ko‘rsatib berish sharti tushgan. Qiz bola bo‘lsam-da, erkak kishini parodiya qilganman va qo‘shiqni ham jonli ijroda kuylaganman. Tomoshabinlar chiqishimni olqishlar bilan qarshi olishgan. Uyga kelsam, otamning jahllari chiqib o‘tirgan ekan. Sababini so‘rasam, ustoz san’atkorning ma’muri unga qo‘ng‘iroq qilib: “Qizingiz nega parodiya qildi?” deb gapiribdi. Otamning bu chiqishimdan xabari bo‘lmagan. Uning xijolat bo‘layotganini ko‘rib, rosa jahlim chiqqandi. Parodiya ham bir san’at, men atayin bu obrazni olib chiqmadim-ku, deganman. Eng yomoni, takroriy ko‘rsatuvda chiqishimni o‘chirtirib tashlashgan, YouTube’ga joylangan variantini ham o‘chirtirishgan. Ammo baribir bu chiqishim boshqa tarmoqlarda tarqalib ketgan. Ustoz san’atkorni hurmat qilaman, ammo bunday e’tirozni kutmagandim. Men mazax qilib chiqqanim yo‘q, berilgan shartni bajardim, xolos.
Izoh (0)