Aktrisa Xonzoda Do‘stova “Daryo”ning YouTube kanaliga bergan intervyusuda bolaligi, salomatligidagi o‘zgarish sabab raqs maktabiga borgani va nima sababdan otasi san’atkor bo‘la turib, qizining bu sohani egallashiga qarshi bo‘lgani haqida so‘zlab berdi.
— Bolalikda juda sho‘x, yerga ursa ko‘kka sapchiydigan qiz bo‘lganman. Oilada ikki farzandmiz, akam biroz erka edi. Ota-onam biror marta akamning ortidan ortiqcha gap eshitmagan. Ammo bolalarni urgan, tartibga chaqirgan hamisha men bo‘lardim. Xonzoda desa hamma tanirdi. Otam Asliddin Do‘stov har doim to‘y-xizmatlari va ijodiy safarlar bilan band edi. Turgan gapki, hamma oilada bo‘lganidek, tarbiyamiz bilan onam ko‘proq shug‘ullanardi. Onam ham san’atkorlar oilasida tarbiya ko‘rgan va bolalikdan san’atkor bo‘lishni orzu qilgan. Otam bilan bir oliygohda o‘qiyotganida, oila qurishgan. Ammo rashk sabab dadam onamning ijod qilishini istamagan. Onam ko‘ngliga ko‘mib qo‘ygan ijod mehrini bizga bag‘ishlardi. Boshqa onalar farzandi bilan o‘yin o‘ynasa, bizning uyda yangi qo‘shiq o‘rganilardi. Xullas, mana shunday muhit sabab akam va men san’atga mehr qo‘yganmiz. Onam bobom singari katta ashulalarni aytishimni istardi, — deydi Xonzoda Do‘stova.
U sog‘ligida muammo sabab, raqsga borgani va ammo 9-sinfni bitirish arafasida otasining birdan qarori o‘zgarib, uni san’atkor bo‘lishini istamagani haqida so‘zlab berdi.
— O‘smirlik vaqtida bo‘yim balandligi va ozg‘inligim sababli, menda bukri bo‘lib qolish ehtimoli yuqori edi. Shunda raqs maktabiga borsa, qomati chiroyli o‘sadi, deb meni Xoreografiya oliy maktabiga berishgan. U yerdagi muhit har tamonlama ma’qul edi. Ammo maktabni tamomlash arafasida otam san’atga bo‘lgan mehrim kuchli ekanligini ko‘rib, hujjatlarimni olib Jahon tilla universiteti qoshidagi akademik litseyga olib borib topshirgan. Til o‘rganishda umuman ishtiyoqim yo‘q edi. Noilojlikdan darslarga borib yurganimda, tengdoshlarimdan ancha ortda ekanligimni anglaganman. Men tabiatan liderlikka intiladigan insonman. Dadamga “San’atkor bo‘lishimni itsamasangiz, repititorimga pul berasiz”, deb darsdan keyin o‘quv kurslariga qatnaganman. Juda qisqa muddatda ingliz tilini o‘rganib, tengdoshlarim ichida birinchi bo‘lganman, — deydi Xonzoda Do‘stova.
Bloger hind kinolarining shaydosi bo‘lgani va Shohruh Xon bilan uchrashish uchun ham ingliz tilini mukammal o‘rganishga harakat qilgani haqida so‘zlab berdi.
— Bolalikdan hind kinosining shaydosi bo‘lganman. U paytlari ijaraga videokassetalar berilardi. Topgan pulimga yangi videokassetani olib, undagi qo‘shiqdan tortib raqslargacha o‘rganib olardim. Koran Johar va Shohruh Xon ijodiga mehrim baland edi, “Albatta, hind kinosida suratga tushaman”, derdim. Shunda kimdir ular bilan gaplashish uchun ingliz tilini o‘rganishim kerakligini aytdi. Ana shu kundan boshlab ingliz tilini o‘rganishni boshladim. Ishonasizmi, san’atga bo‘lgan mehrim sabab, 4 yilda ingliz tilini o‘rganib, IELTS’dan 7,5 ball oldim. Toshkentda Hindistondan kelgan sayyohlarga tarjimonlik qilganimda ulardan biri kino sohasida ishlar ekan. U menga “Husning bor, qo‘shiq aytib, raqs tusholasan. Ammo hind filmlarida suratga tushish uchun 18+ rollarni ham ijro etolishing kerak. Bo‘lmasa asosiy rollarni o‘ynolmaysan”, degandi. Bu gapdan keyin orzumdan voz kechishga qaror qildim. San’at uchun o‘zimning qadrim va ota-onamning sha’nini yerga urolmayman, — deydi aktrisa.
Izoh (0)