Shavkat Mirziyoyevning Yevropada xavfsizlik va hamkorlik tashkiloti Demokratik institutlar va inson huquqlari bo‘yicha byurosi missiyasi rahbari Albert Yonsson bilan uchrashdi.
20-aprel kuni bo‘lib o‘tgan uchrashuvida O‘zbekiston Respublikasi Konstitutsiyasiga o‘zgartirishlar kiritish bo‘yicha referendumga tayyorgarlik ko‘rish va uni o‘tkazish masalalari ko‘rib chiqildi.
Davlat rahbari YXHT bilan sermahsul aloqalar, ochiq va konstruktiv muloqot yo‘lga qo‘yilganini mamnuniyat bilan qayd etdi. O‘tgan yilda O‘zbekistonga YXHT raisi, Polsha tashqi ishlar vaziri Zbignev Rau, tashkilot bosh kotibi Xelga Shmid, Milliy ozchiliklar masalalari bo‘yicha Oliy komissar Qayrat Abdurahmonov tashrif buyurgan.
Byuro ekspertlari mamlakat milliy saylov tizimini modernizatsiya qilishda, shu jumladan, Saylov kodeksini ishlab chiqishda ishtirok etgan. DIIHBning 2016, 2019 va 2021-yillarda O‘zbekistonda bo‘lib o‘tgan umumxalq saylovlaridagi keng ko‘lamli missiyalari yakunida berilgan tavsiyalar hisobga olingan va joriy qilingan.
Uchrashuv davomida referendumni yuksak xalqaro standartlarga muvofiq tashkil etishning turli jihatlari yuzasidan fikr almashildi. Missiya rahbari Albert Yonsson mamlakatning yangilangan Konstitutsiyasida o‘z aksini topgan Yangi O‘zbekistondagi demokratik yangilanishlarni yanada chuqurlashtirish jarayonlarini qo‘llab-quvvatlashini bildirdi.
Izoh (0)