Qashqadaryo viloyatida 48 yoshli soliq inspeksiyasi mansabdori vafot etdi. Bu haqda “Daryo”ga marhumning ayoli xabar berdi.
Maʼlum bo‘lishicha, marhum Adham Amanov 2023-yilning 11-aprel kuni shifoxonada vafot etgan.
“2023-yil 11-aprel kuni turmush o‘rtog‘im ish vaqtida ish joyida vafot etdi. U kishi 48 yoshda edi. Erim Qashqadaryoda soliq sohasining yetuk mutaxassisi va fidokor xodimi edi. U kishi qisqa umri davomida viloyatda bo‘lim boshlig‘i, bir necha tumanlarda rahbar lavozimlarida ishlagandi”, — deydi marhumning xotini.
Viloyat Soliq boshqarmasi axborot xizmati rahbari Firdavsiy Jabborov marhumning o‘limini tasdiqladi.
Taʼkidlanishicha, marhum 2023-yilning 23-mart kuni boshqarmadagi vazifasidan olinib, Mirishkor tumaniga tuman Soliq inspeksiyasi boshlig‘i vazifasini bajaruvchi etib tayinlangan.
Boshqarma masʼullarining aniqlashtirishicha, marhum o‘limi sodir bo‘lgan kuni ertalab Mirishkor tumaniga ishiga borgan. Tobi bo‘lmagach, shifoxonaga borgan va shifoxonada vafot etgan.
Marhumning yaqini Adham Amanovning o‘limida uchinchi shaxsni ayblamoqda. “Daryo” murojaatchi tomon fikri bilan cheklanib, bu ayblovni ommaga oshkor etishdan tiyilgan holda surishtiruv olib borilayotganini, qo‘shimcha maʼlumotlar oshkor bo‘lsa, bu haqda batafsil to‘xtalishini maʼlum qiladi.
Izoh (0)