Jizzax viloyatida sotish maqsadida olib ketilayotgan 400 kilogrammdan ziyod go‘sht mahsuloti yoqib yuborildi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, 12-aprel kuni Do‘stlik tumani hududida joylashgan Manas-14 yo‘l-patrul xizmati maskanida ichki ishlar organlari xodimlari Toshkent yo‘nalishida harakatlanayotgan Nexiaʼni to‘xtatgan. Qashqadaryo viloyati Chiroqchi tumanida yashovchi fuqaro boshqaruvidagi mashinani ko‘zdan kechirish chog‘ida yukxonada 315 kg go‘sht borligi aniqlangan. Haydovchi go‘shtni Toshkentga sotish maqsadida olib ketayotgan bo‘lgan.
Xuddi shunday Sangzor-15 YPX maskanida xizmat olib borayotgan IIO xodimlari tomonidan Jizzax shahri yo‘nalishida harakatlanayotgan Nexia to‘xtatilgan. Avtomashinada haydovchi mahalladoshiga tegishli 100 kilogramm go‘shtni Baxmal tumanidan Jizzax shahriga sotish uchun olib ketayotgani aniqlangan.
Ikkala holatda ham biror hujjat taqdim etilmagan va tashish jarayonida sanitariya qoidalariga rioya qilinmagan. Laboratoriya tekshiruvlari natijasida go‘sht mahsulotlari isteʼmolga yaroqsiz ekani aniqlandi va tegishli tartibda yoqib yuborildi.
Izoh (0)